Nongpoh, Nailar 22 : Kum kawei na ka jingthmu ban sei madan ïa ki sap ki phong ki khun samla kynthei bad shynrang ha ka kam ïalehkai phutbol, ka Lyntijam Welfare Development Association ka la rai ban pynlong biang ïa ka Sunfeast Cup 2022 na ka bynta ki kynhun ïalehkai bapher bapher kynthei bad shynrang kumba ka la ju pynlong baroh shi katta ha Ri Bhoi.
Ka Lyntijam Welfare Development Association ka la hap ban pynsangeh noh ïa kane ka Sunfest cup ha kine ki ar snem, na ka daw ka jingdon ka khlam COVID-19 bad mynta u snem ka la rai biang ban pynlong ïa kane ka jingïalehkai phutbol ba la tip kum ka ‘6th Edition Football Sunfeast Cup 2022 ha ki ar tylli ki madan ïalehkai ha Ri Bhoi kynthup ha ka madan ïalehkai jong ka shnong Mawlein Mawkhan bad ha ka madan ïalehkai ka Shnong Jyntru.
Kumba la ïathuh da u President ka Lyntijam Welfare Association, u Bah Sumarlang Swer, u la ong ba ka Lyntijam Welfare Development Association kan pynlong ïa kane ka jingïalehkai phutbol, ka dei ruh da ka jingkyrshan ka ITC Sunfeast bad ka SPT Sports, Bangalore kiba la ju kyrshan na ka bynta ban kyntiew ïa ka kam ïalehkai phutbol ki khun samla ha ka jylla bad ka ri India hi baroh kawei.
U la ong ruh ba ïa kane ka jingïalehkai phutbol yn pynlong ha ki ar bynta kata ka dei na ka bynta ka under-16 kiba dei ïa ki kynthei bad shynrang bad kawei pat ka dei na ka bynta ka under-13 ki shynrang.
U la ïathuh ruh ba kane ka jingïalehkai phutbol ba la tip kum ka Sunfeast Cup kan sdang naduh ka 24 tarik u Nailar 2022 haduh ka 2 tarik u Risaw 2022 bad na ka bynta ban pynpoi ïa ki kyrteng jong ki kynhun ne ki club kan long ha ka 10 tarik u Nailur 2022 bad ban peit bniah ïa ki rang bad ki thei ïalehkai (Screening) kan long ha ka 16 tarik u Nailur 2022 ha ka ophis treikam ka Association ha Mawtnum.
Ban pynlong ïa kane ka lympung ïalehkai phutbol kaba jop bad kaba ai jingmyntoi na ka bynta ki khun samla, ka Association ka khot ka wer ïa ki kynhun ne ki club bapher bapher ban wan shim bynta ha kane ka Sunfeast Cup bad kin don ruh ki khusnam ba la pynkhreh na ka bynta ki kynhun lahduh bad kito ki lah duh kin ioh ïa ka nam ‘Meghalaya Master’ ban mihkhmat pat ïa ka jylla sha ka lympung ïalehkai na ka bynta ka thaiñ Shatei Lam Mihngi ka rir India ka ban long ha jylla Assam., u la bynrap.
