Shillong, Risaw 29: U Myntri ka tnat Tourism u Bah Paul Lyngdoh ha ka sngi baar u la ong ba ka tnat shen kan sa ïakren halor ka jingtyrwa ban pyntreikam ïa ka reciprocal transport agreement (RTA).
Haba kren sha ki lad pathai khubor, u Bah Lyngdoh u la ong ba ka jingpyntreikam ïa ka RTA kadei kaba la ai jingmut da ka All Khasi Hills Meghalaya Tourist Taxis Association (AKMTTA).
“Ki la don artylli ki jingïalang ba la shim da director bad ka seng kaba sngewkhia halor kane ka kam. Ïa ka AKMTTA la kyntu ba kin ai ïa ki jingthoh bad ïa ki jingai jingmut jong ki halor ka RTA ha kaba ki ong ba kane ka don bad treikam sha kiwei pat ki jylla,” u la ong.
“Shisien ba kane ka jingtyrwa ka la wan na ki, ngin sa ïakren hynrei na ka liang director la ïakren bad kine ki kynhun bapher bapher,” pynthikna u Bah Paul.
