Shillong, Risaw 29: U Myntri ka tnat ki kam jngohkai ka jylla u Bah Paul Lyngdoh ha ka sngi ba ar u la khmihbniah ïa ka jingpyntreikam jong kiba bun ki project ha ka jinglut kaba long palat T. 400 klur na ka bynta ki kam pynroi bad ka jingkyntiew ïa ki kam jngohkai ha ka jylla.
U la pynbna ruh ïa ka rai ban pyntreikam ïa ka “tourism buddy scheme”, ka ban pynsuk ïa ki nongwan jngohkai kiba wan sha kane ka jylla na ki jaka bapher bapher.
Haba kren sha ki lad pathai khubor hadien ka jingïalang, u Bah Lyngdoh u la ong, “Ka jingkhmih bniah kaba la leh mynta ka sngi ka long halor ka kam jngohkai, kaba baroh ki la ïatip ba ka nongbah ka la kiew sha kawei pat ka kyrdan halor ki kam jngohkai kaba la buh ha ka thong haduh u snem 2025.”
U la ong ba la batai ïa u commissioner & secretary bad director shaphang kiba bun ki project kiba la kot sha ka jinglut kumba T. 400 klur kiba la shim ban pyntrei da ka tnat.
“Na kine, ngi don ruh ki project ba la bei tyngka da ka Asian Development Bank (ADB) kaba la kot sha ka jinglut kaba T. 191 klur bad kumjuh ruh na ka state plan, ngi la buh ruh ka jingmang pisa kaba T. 227 klur na ka bynta kiba bun ki kam jingtei ha kiba bun ki jaka jong ka jylla Meghalaya,” u la bynrap.
U Myntri u la pyntip ba ka tnat shen kan wanrah ïa ka skhim kaba la khot ka “tourism buddy scheme” na ka bynta ban aikam ïa ki samla, ha kaba kin ïoh ruh ki jingshah hikai kiba lyngkot ba kin trei ïa ka kam ban ai ki lad jingïada, ban ïalam lynti ïa ki nongwan jngohkai bad kyllum lang ba ki nongwan jngohkai kin sah ha Shillong bad kiwei pat ki bynta jong ka jylla da kaba suk kaba saiñ.
“Ngin sdang shwa da ka batch kaba don kumba 70 ngut tam ki samla. Kane kan long lyngba ka NIT (notice inviting tender), ka ban sa pynmih shen da ka directorate of tourism. Ngin sa khot ïa ka NIT ha kine ki ar ne lai sngi naba ngi kwah noh ban ïohi ïa ki ha ki jaka hapdeng jong u bnai Naiwieng, naba kane ka dei ka aïom ba ju wan bha ki nongwan jngohkai,” u la ong.
“Ngin pynthikna ba kan don ka jingïatreilang bad ka imlang sahlang bad kumjuh ruh ki dorbar shnong, naba ka kam jngohkai ka la kiew bha mynta ha ka jylla. Kine ki samla kin long kum ki nonglam lynti, ki nongïarap, ki nongbatai bad ki nongïarap ïa ki briew, kiba lah ban jah lynti,” ong u Bah Lyngdoh da kaba bynrap ba kine ki tourism buddy yn buh khamtam ha ki jaka ba bun ki nongwan jngohkai kum ka Laitlum, Ward’s Lake, Mawsmai cave, Arwah cave, Nohkalikai, Dainthlen, Mawlynnong, Mawkdok, Golflink, Shnongpdeng, Kransuri bad kiwei.
U Myntri u la ïathuh ruh shaphang ka Shillong ropeway project bad pyntip da kaba ong, “Ki kam ki la ïaid bad hapdeng jong u Naiwieng, ka kam kan sdang noh.”
Shuh shuh u Bah Lyngdoh u la pyntip ba ka tamasa ba arsngi ka Cherry Blossom festival, kaba dei ka tamasa kaba heh kaba don la ka jong ka brand, un wan ban plie da u Myntri ka tnat DoNER ka sorkar pdeng ha ka jingdonlang u Myntri Rangbah bad u Myntri ka tnat tourism ha ka 15 tarik u Naiwieng.
“Ngi dang ap ruh ïa ka jingpynthikna na ka sorkar ka ri Japan ban tip mano na ki heh ki haiñ ki ban wan sha kane ka tamasa naba kane kadei ka sien kaba nyngkong ba ngi la ïatreilang ba ka ri Japan,” u la ong.
U la pyntip ruh ba ka tamasa LIT kan long ha ka 17-18 tarik u Naiwieng ha kaba ki nongthoh ba pawnam kin sa wan.
