Shillong, Nailar, 05: U Symbud Myntri Rangbah ka jylla u bah Prestone Tyngsong uba dei peit ïa ka tnad PWD (Roads) u la ïathuh ba ka National Highways & UInfrastructure Development Corporation Ltd (NHIDCL) shen kan sa maramot noh ïa ki bynta ba la sniew jongka surok Shillong-Dawki.
Haba ïakren bad ki lad pathai khubor ha ka Sngi Thohdieng u la ong “ Nga la btah ïa ka NHIDCL ban maramot noh namar kane ka dei ban ïai bteng katba ym pat dep shna ïa ka surok ba thymmai. Kane ka jingmaramot ka dei ban ïai bteng barobor namar bunsien ka surok ka sniew namar ka dei ka aiom ba jur bha u lapbah bad kumta ki surok ki kloi ban jot bad julor”.
U la ïathuh ka daw pat ba sniew palat ka surok na Rngain sha Langkyrdem shaduh Dawki ka dei namar ba ki bun palat ki kali ba leit kit mar sha ka kad khaïi kaba ha Dawki. Kumba 600 haduh 700 tylli ki trok ki dang ïaid man la ka sngi. “Kumta nga la bthah ïa ka NHIDCL ba kin leh kloi ïa ka kam bad ban pynbha ruh tang shu sdang ban khoh ne sniew ka surok khnang ba kan ym ktah ïa ki kali ba ïaid ba ïeng khamtam ki kali ba kit briew” ong u bah Prestone.
Ha kaba ïadei bad ka jingkhot tender na ka bynta ban shna ïa ka surok Shillong -Dawki u la ïathuh ba la dep nadong shadong bad na ka bynta ka Package -I ïa ka work order yn sa ai noh shen ban sdang noh ïa ka kam.
Hynrei na ka bynta ka Package II bad Package IV bad V ka jingkhot tender ka dang ïaid shakhmat lyngba ka online bad lehse kane kan kham shim por khyndiat.
Nalor kane la ïathuh ba u dang bishar bniah ruh ïa ka jingpynkhreh shna ïa ka surok na Dainadubi, Darugre shaduh Williamnagar kaba la bei tyngka na ka skhim Bharatmala.
ïa kane ruh la dep aiti sha ka NHIDCL bad ka jingkhot tender ruh ka la jan kut hynrei kane pat ka kham shimpor namar kham slem ba ïoh jingbit na ka tnad kam khlaw bad kumjuh ruh ïa ka jaka puta ban pynheh ïa ka surok.
“ Halor kane nga la khot jingïalang ia baroh ki Deputy Commissioner ha kaba la rai ba kin shim khia ban pynïoh noh ïa ki jaka bad ban siew ïa ka bai jaka bad kumjuh ban bud dien ïa ka kam na ka tnad kam khlaw kaba dang sahkut ha u DFO” ong u bah Prestone.
