Shen yn leit jurip u Mukul Sangma ïa ki projek bapher bapher ba thmu pyntrei kane ka sorkar

Shillong, Jymmang 25: U nongïalam ka liang pyrshah u Mukul Sangma u la rai ba shen u la leit ban jurip ïa ki project bapher bapher kiba kynthup ïa ka jingtei ba la tyrwa halor ka Secretariat bathymmai ka sorkar kaba ha New Shillong Township (NST) bad u la buh ruh ka jingkylli halor ka rai jong ka sorkar halor ka jingkynnoh ba ka la iehnoh ïa ka Ampati football stadium project ha South West Garo Hills District.
Haba kren sha ki lad pathai khubor u Sangma u la ong, “Ngin sa leit ban jurip ïa ki jingtei jong ki projek bapher bapher kiba la shim da kane ka sorkar, kynthup ïa ka secretariat bathymmai ha kaba ka sorkar jylla ka la ong ba kin pynlut T. 1000 klur.”
U la bynrap, “Ngam lah ban tip kaba kum kano ka secretariat bathymmai ki kwah ban tei? Katno tylli ki kamra kin don? Katno ka jingheh jong ka jingtei bad ka jaka? Baroh kine dei ban tip da ki paidbah. Hato kin tei ïa ka seven star hotel standard ne ka five star standard hotel?”
“Baroh kine ki dei ki kam jong ngi bad nga sngewkhia naba ka jingduna ka pisa ki paidbah ne ka jingtei kan bei da ka sorkar pdeng ne na ka pisa jong ka sorkar jylla. Kumta ngi donkam ban bishar bad ban peit ïa ka bha ka miat jong ki paidbah bad ban ïada ïa ka bha ka miat ka jylla,” bynrap u Sangma.
Haba ther ïa ka sorkar jylla ba ka la pynslem ban pyndep ïa ka Ampati football stadium, u Myntri Rangbah barim u la ong ba ka Ampati stadium ka dei kawei na ki jingtei ba la thaw ha ryngkat bad kiwei ki jingtei ha ka por ba u la leh kaba long ruh na ka bynta ka Shillong bad Tura, kaba lah ban pynlong ïa ka National Games ha ka bynta jong ka East bad West. Namar kata da kaba buh jingmut halor ka jingdonkam ka khyndew kat kaba don, kumta na ka bynta ka stadium ha Tura kaba la tei da kaba bujli ïa ka Dikibandi stadium ba mynshwa, kane ka stadium la dei thmu ban tei sha kawei ka jaka kaba don ka jingheh ka jaka kaba 25 acre, hynrei kane ka sorkar ba mynta ka jied ban tei ha kane ka jaka kaba mynta kaba la thmu ruh ban pynlong na ka pisa jong ka jylla.
U Sangma u la pynpaw da kaba ong, “Phim lah ban tei ïa ka stadium ha ka jaka kaba ym don wat ka jaka pynïeng kali. Kadei ka jaka ka ym don ïa ka jaka ïa ki riew ieid sport ban ïeng laiñ haba ki kwah ban rung sha stadium. Ki don kiwei ruh ki kam kum ka jingshngaiñ, ka jinglah ban talasi, nangta ki jinglah ban jia ba sngewsih nangta ka jingdon ka emergency exit bad kiwei kiba long kiba donkam.”
Shuh shuh u la buh ka jingkylli ba kaei ka daw ba la pynlong ïa ka sorkar slem ban pyndep ïa ka project Ampati football stadium.
“Kumta ka long kaba donkam na ka liang ki paidbah ban tip sha ei baroh kato ka pisa kaba la mang mynshwa la pynlut bad hapoh kiei ki kam,” ong u Sangma da kaba bynrap, “Nga la khmih ïa ki kam bapher bapher kiba la kyrshan da ka jingmang pisa kaba mynshwa bad kiwei pat ki kam kiba la mang pisa biang da ka sorkar jylla. Kumta nga ki dawa ban ngeit ba ka don ka duplicacy haba ïadei bad ki kam. Kumjuh ruh kum kine ki kam don sha kiwei ruh ki jingpyntrei.”