K a elekshon MP kaba dang shu dep long ha ka ri ka la buh ïa ka jingkylli kaba u paidbah nong shnong ka ri u pyrkhat puson bha ïa ka mynta, kane ka long ‘shano pat ka lawei ka seng Congress’ hadien ka jingshah rem ha ka elekshon ha Shillong bad dang shen ha Tura.
Aiu ha lyndet kaba ki paidbah kim mon shuh pat ïa kane ka seng saiñpyrthei ba la rim bha ha kane ka ri, ka jubab ïa kane ka long ba kum ka seng saiñhima ba la rim ha ka ri, ka juk kaba mynta kam kwah ba kan shem ne ban ïohi ba ïa ka jinglong nongïalam yn bat sah tang da kijuh ki briew ki bym lah ban jam ïa ki jingeh kiba bun.
Hynrei kum ka party kaba la rim ha ka ri, u saihon u dang ïai meh, hadien ka jinglah pat ka jong kaba kan jop kham bun tylli ki Constituency ha ka elekshon 2024 lada ïa nujor bad ki 10 snem kiba ladep, tangba, ka jingjop baroh ka dei namarba dang don ki jaka kiba ki briew ym dei ba ki jied mon sngewbha tang ïa kita ki nongïalam pynban ka dei namar ka jingkyrmen ka jong ki, ba ka jingjop kane ka seng, ka kham wanrah ïa ka mynsiem ba kham ïoh ïa ka shongsuk bad ka shongsaiñ ha ka ri.
Haba khmih ïa ka jingïaid lynti jong ka Congress ha kane ka jylla la i kumba kan jah mynsiem bad kan shu dkhut mynsiem noh hi namarba ki MLA bad ki MDC ki la iehnoh ïa ka party kaba la pynjop ïa ki da ka jingkyrshan jong ki paidbah. Kane ki jingjia ha ka seng Congress ka la pynlong ïa ki nongïalam barim ba lah ryngkoh sha kiwei ki seng saiñpyrthei ban ong, “ka lieng jong ka seng Congress ka la jan ngam. Ki paralok kin sngewbha ban kynthih noh shwa ba kin ngam jyllop.”
Watla ki lai ngut ki ngut ki MLA kiba kynthup ïa u Bah Gabriel Wahlang, u Dr. Celestine Lyngdoh bad u Bah Charles Pyngrope ki la ryngkang dieng kper, hynrei wat hapdeng ka jingshah ieh marwei jong u MLA ka Congress na Mylliem u Bah Ronnie V. Lyngdoh u la ieng rangbah ban kyntait ïa ki jingshah pynthame hynrei u ieng beit ha ka nongrim kum u rangbah uba shisha.
Ka jingwan sa ka elekhson MDC ha u snem 2025 ka la pynktha khlieh ïa ki nongïalam ka Meghalaya Pradesh Congress Committee namarba kin hap ban khan ban puson bha ïa kum kino ki briew kin ai tiket namarba ynda ki la jop ïa ka elekshon ïoh ki long ki nongshet kylla namarba ha ki Autonomous District Council (ADC) kim don ïa ka aiñ kyntiap seng ne Anti-Defection Law.
Ka elekshon kane ka la tied jingkhang, dei sa tang ka Congress bad ka HSPDP ki seng saiñpyrthei kiba la rim bha naduh ba la ïoh ïa ka jylla Meghalaya bapura haduh mynta kim pat pynbna satia ïa ka kyrteng jong ki kyrtong ïoh lehse kiba pan tiket ki duna bha namarba kim sngewshngaiñ la kin jop neem ha ka jylli ïakhun.
Ka jingphet jong ki 12 ngut ki MLA ka Congress ha u snem 2017 bad ka jingphet jong ki 3 ngut ki MLA dang shen ka la pynduh jingshaniah ïa ki paidbah nongthep vote namarba kim ïohi shuh ïa ka lawei kaba phyrnai ha ka Congress ba kan dang ïoh bat ïa u lakam synshar ha ki Autonomous District Council kiba long ki stieh ïada ïa ki lai tylli ki jaidbynriew ha kane ka jylla.
Ka Congress kan hap ban shong bad ban puson bad pyrkhat bha ban wad ïa ki kyrtong kiba biang ka rynieng ryniot kiba lah ban pynkohnguh ïa ki paidbah nongthep vote khnang ba ka lawei jong ka Congress kan ym sah umdum ha ki snem ki ban sa wan.
