Shano jah ka ILP bad jingïada ïa ki khristan na ka Vision Document ka BJP ?

KA ÏTKHMIH :
Shillong,Rymphang 16 : Katba nangjan ka election sha ka Dorbar Thaw-aiñ jong ka Meghalaya, katta ruh ki national political party ki ïaleh ban sei la ki buit ki bor ban pynbieit paidbah. Don kiba wan rah da ki Tyngshop da ki Puron jong ka Bollywood, don pat kiba wanrah da ki kmie ki kpa tymmen, ki Masan ki Maduh bad ki Meiheh ki Meili jong ka party jong ki naduh na rithor shaduh sha rilum. Tip ka jadu sha, shohbieit shohtyndep lut la ha ka rong ka rup ne ha ka sbai rupa. Lada kito ki samla ba tur sha surok ban pyrshah sorkar kim kyrshan party, na ei heit ki mih ki hajar phew hajar ki samla ban synran ban kynhui bad u candidate jong ki party.
Hadien ba ka BJP ka la pyllait paidbah ïa ki 12 tylli ki Mat jong kata ka Vision Document ne Dorbin Sansnem jong ki lyngba ki advertisement full front page ha ki kotkhubor 16.02.2023, bun ki paidbah ki lyngngoh wat la ki jer ïa kata ka 3 lakh shiteng ban kyrshan kam hi dalade (self employment) pynban khlem kren ei ei ïa ka jingaikam kaba la put ronsing ha ka manifesto 2014 ban ai haduh 25 crore ki samla bym pat donkam hynrei haduh mynta tang shi powa na katei ka jingkular kam pat urlong. Kaba kham sngewlyngngoh shuh shuh ka long ba ka mat jingdawa ba kongsan jong kane ka Jylla (ba la dep ban passed da ka Assembly) ban pyntreikam noh ïa ka Inner Line Permit (ILP) kam shym ïoh jaka ha kane ka Dorbin Sansnem jong ka BJP, balei. Kum ka jingpynkynmaw, uwei na ki arngut ki MLA jong ka BJP, ha ka por ba thnam bha ka jingïakhih ILP hangne, u la ong ba un kloi wat ban suicide ïalade ruh hakhmat u PM lada ym ai ILP, hynrei khyndiat bnai pat shwa kane ka election utei u juh hi u MLA u ong “Ai ïangi 31 ngut ki MLA, ka ILP kan dei ka jongphi”. Ki nia pynbieit, ki tuid na u thylliej khlem shyieng hynrei hakhmat u Amit Shah bad Narendra Modi tang ban saham ILP ruh ymnud. Ban pynshisha ïa kata, arsien arwat la wan jngoh u Amit Shah kum u Union Home Minister hangne, tang ban ïakren ïa katei ka mat ruh ym ïoh, phi tharai kine ki briew ki don mon ban pynhun ïa ka jingkwah ki trai shnong hangne, em !, shu wan pynbieit da kane katai. Haduh mynta,ka ILP ka dei tang ka jingphohsniew ha ri ki rngai. Ka jingaidaw matlah jong u Rituraj Sinha National General Secretary jong ka BJP, hana ba ka ILP kan long diengpynkiang ïa ki kam jngohkai pyrthei ha Meghalaya,kaba la khur bun ka khajna na kata. Lada ïa ka Art.370 ka special status jong ka Jammu Kashmir lah ban pynduh ïa ka shiteng miet shiteng ïong, kan eh aïu ïa ka BJP ban amend ïa ki Clause jong ka ILP ban pynjynsur ïa ka Tourism ha Meghalaya.
Shuh shuh, ym shym ïohi ei ei ruh ha kata Dorbin Sansnem jong ka BJP ban ong “ba ngin ïada ïa ka jingngeit khristan jongphi bad ban pynshitom ïa ki kynhun hindu ba thombor” bad ym shym la kdew hi ruh ba “kin kdup ïa ka hok longtrai ki nongshongshnong rilum (Schedule Tribe)”. Hapdeng ki jingkhih phaloh jong ka jinglehbeiñ khristan, la khmihlynti haba la wan kat kita ki heh jong katei ka party, ki la dei ban kren shikyntien arkyntien, hynrei kawang ktieh pynban ïa ki liang pyrshah (kum ka Congress bad TMC) ba dei ma ki kiba pynklang bad isih khristan, u bieit haba duh ka kali te wat ïa ka taïar (spare tyre) ruh u kynnoh. Ngim ju ïohsngew ïa ka jingshah thombor jong ki khristan bad ki ritpaid haba ka secular party ka bat ïa ka jingsynshar ha Delhi.
Ha kawei pat ka liang,wat la ka don ka mat ‘Free Education for Girls’ haduh mynta kata ka slogan u Modi kaba ong “Beti Bachao Beti padhao”( ïarap ïa ki khun khynthei bad pynnang pynstad ïa ki) kam pat shym la urlong hangne ha ka Jylla. Ka Ministry of Women and Child Development ruh ym kham da ïohsngew ba ka Education department hangne ki pyrta bad ki tyrwa scheme. Ki kmie ki kpa ki nang hap hi ban ksaid dalade ban kyrshan ïa la ki khun kynthei.
Ka bai tuition, baiskul, bai college ka bankhia kumjuh. Hangne,ha Meghalaya lei ynnai da batai ïa katei ka mat, ka kynthei ka la ïoh lypa ïa ka kyrdan ba kham kyrpang, ka jait ka kynja la ai lypa sha ka khun kynthei (matrilineal society). To mutdur maphi, lada la ïoh jingkyrshan lei sa kata ka Scheme, ngi ngeit ba ki khun kynthei jong ngi kin mih bun ha ki Indian Administrative Service ne ha Indian Foreign Service bad kiwei.
Ha man ba wan kine ki heh BJP hangne, wat la ki nongthoh khubor ki pashat jingkylli shaphang ki jingshah lehbeiñ jong ki khristan ha kylleng ka ri India, kin nym jubab direct hynrei ki pyrshang ban kdat noh shawei pat ban lait na katei ka jingkylli.Ka don ka jingsyier, lada ka NDA kan pynurlong lei sa kata ka Uniform Civil Code (UCC) wat ka Sixth Scheduled kaba kdup kyrpang ïa ki rilum ka don ha ka jingma. Ka jingkren kop ba khlem ka BJP ym don mano mano ba lah ban thaw sorkar,ka dei ka jingthmu ba triem bha shalyndet pyrda. Ka mut lada kiwei ki party ki ïa synroplang bad cross ïa ka 32 ne 33 ngut, yn nym lah ban thaw sorkar, kata te ka la dei ka Monarchy ym shuh ka Democracy.
Khatduh eh kaei kaba donkam ka long ba ki national party haba ki thaw ïa ka Manifesto ne ki Vision Document jong ki, ki mat ki dei ban long kiba deidoh deisnam bad kato ka jylla; lym kumta, ka dorbin ne ka vision kan long ka jngut bad ka bym lah ban jop pyrthei.