Shah weng 3 ngut ki longsan ba kynnoh ai wai jaka khlem ka jingtip ka Raid Nongkhrah
Shillong, Naitung 11: Ka Joint Action Committee jong ki Sankur Sankpoh ka Raid Nongkhrah kaba la long ha ka 22 tarik u bnai Jylliew ka la jied biang ïa u Bah Rodney Syngkli kum u Pator ka Raid Nongkhrah bad ka jingïalang ka la weng noh ïa lai ngut ki longsan kynthup u Bah La Lyngdoh, u Phis Nonglong bad Bilshon Nongkoum halor ki kam leh donbor ban ai wai ïa jaka jong ka Raid kaba pyrshah ïa ki riti dustur treikam ka Raid.
Ha ka jingiakren bad ki lad pathai khubor u Pator Rodney Syngkli u la kynnoh ba kitei ki longsan lai ngut ki la leh buit tuh ban ai wai ïa ka jaka ka Raid ba la tip kum u Lum Narphnow bad buh ïa ka Green Hills Resturant kaba dei trai da u Bah Kyrmen Syngkli khlem ka jingtip ka dorbar Raid bad u Pator.
Ula ïathuh ki la leh ïa katei ka kam buit tuh ryngkat ka jingïasylla lang bad u Sirdar Nongpoh, u Rangbah shnong ka Umrangksai ban ïoh knieh ïa ka jaka jong ka Raid Nongkrah da kaba plie ïa ka ïew rud surok ne Lay Bye Market ha Umrangksai khlem da ïoh jingbit ne mynjur ka dorbar Raid.
U la ong ba kitei ki longsan ki la bam klop ka pisa bai jaka shna surok Fourlane ba T.8,70,000 kaba dei jong ka Raid bad ula buh jingkyli shaei ki buh ïa katei ka pisa bad kine ki jingleh ki wanrah ka jingkulmar hapoh ka Raid bad ki jingïashun hapdeng ki kur Syngkli bad kiwei ki kur.
U Bah Syngkli ula ïathuh ruh kitei ki longsan kim ju khot meeting ïa u Pator naduh ba la jied ha u snem 2017 haduh mynta. Kumta ka JAC ka la rai bad weng noh ïa ka kyrdan longsan jong ki hapoh ka Raid, bad ka la thung ïa 3 ngut ki longsan ba thymmai, kata u Bob Lyngdoh kum u Longsan ha ka jaka u La Lyngdoh bad u Mos Lyngdoh kum Asstt Lyngdoh, u Mathias Thangkhiew ha ka jaka u Phis Lyngdoh bad u Jrill Nongkoum ha jaka u Bilshon Nongkoum.
Ka jingïalang ka la rai ban khang shwa noh ïa ka Green Hills Restaurant bad ïa ka Lay bye Market ha shnong Umryngksai, namar ka jingleh donbor u Sirdar Nongpoh bad ki katto katne ngut ki rangbah khlem ka jingtip kiba bun balang bad ka dorbar Raid Nongkhrah.