Shillong, Nailur 26: Ka khubor ba la ïoh na ki pulit la ïathuh ba u Bah Dolingstar Kharshïing u la phah ka jingujor ba ha ka 7 tarik u Naitung, 2024, uwei u Raphael Dohling u la shim ïa ka thuk thuk jong u kaba don u nombar ML-05AA-7153 na ka bynta ka test ride halor ka nongrim ban thied ïa kane ka thuk thuk hynrei u khlem wan pynphai shuh ïa kane ka thuk thuk jong u.
Ha kawei pat ka jingjia ki pulit ki la ïathuh ba ka Tina Sun ka la phah ka jingujor ba ha ka 24 tarik mynta u bnai ha ka por 1 baje nohphai sngi, ki runar bym lah ban ithuh ki la prong hapoh ka ïing jong kaba kaba ha Umlyngka Lumshyiap, Upper Shillong bad ki la tuh napoh ka ïing jong ka.
Shuh shuh ki pulit ki la ïathuh ba u Kusman Rani u la phah ka jingujor pyrshah ïa ki 3 ngut ki briew kiba kyrteng PL Mawnai, E Basaïawmoit bad P Marbañiang, da kaba kynnoh ba ki la tuh ïa ka pisa kumba T. 10 lak napoh ka kali jong u kaba don u nombar ML-05T-5746 na ka shnong Kynrud (EWKH), ha ka 17 tarik mynta u bnai ha ka por kumba 9.30 baje mynmied.
