Shillong Risaw 18: Ka khubor ba la ïoh na ki pulit la ïathuh ba u Bah Donbokson Kharkongor u la phah ka jingujor ba ki runar bym lah ban ithuh ki la tuh ïa ka scooter jong u kaba don u nombar ML-05X-9968 na jaka pynïeng kali kaba don ha Dreamland Parking Lot, Shillong.
Shuh shuh na ka liang ki pulit ki la ïathuh ba u Tarun Joshi u la phah ka jingujor ba hapdeng ka miet jong ka 15 bad 16 tarik mynta u bnai, ki runar bym lah ban ithuh ki la tuh ïa ka Maruti Eeco van kaba don u nombar ML-05V-2933 na surok TB Hospital, Barapathar, Shillong.
Ha kawei pat ka liang ki pulit ki la ïathuh ba uwei ka nongshong shnong na Shillong ua la phah ka jingujor ba ha u bnai Lber 2024, katba ka dang jubab ïa ka jingpynbna ba la ai kyrteng da ka ‘Tips on Stock’ hapoh ka Instagram, kawei ka kynthei kaba la ithuh kyrteng da ka Ankita, ka la pynngeit ïa u ban thep ka pisa kumba T. 90,000/-, da ka jingkular ba un ïoh kham bun ka pisa. Kham hadien une uba la ujor u la shem ba u la shah thok ha katei ka briew.
