Shilong, Ïaïong 29: Ka khubor ba la ïoh na ki pulit la ïathuh ba uwei u nongshong shnong ka nongbah Shillong u la phah ka jingujor ba ha ka 14 tarik mynta u bnai ha ka por 7 baje mynmiet u la ïohpdiang ïa ka phone call, ha kaba u nong phone u la kam ba u dei u agent ne uba ju die ïa ki thuk thuk second hand lyngba ka ‘Facebook’ bad u la pynngeit ïa u ban thied kawei ka thuk thuk Avenger ha ka dor T. 45,000/-. Hynrei kham hadien pat utei uba la ujor u la sngewthuh ba u la shah thok ha utei uba kam ba u dei u Agent nongdie thuk thuk.
Ha kawei pat ka jingjia ki pulit ki la ïathuh ba u Arjun Kumar Mahatoo u la phah ka jingujor ba hapdeng ka miet jong ka 26 & 27 tarik mynta u bnai, katba u dang thiah hapoh ka MUDA parking lot ha Ïew Mawlong, Ïewduh, Shillong, ki runar bym lah ban ithuh ki la tuh ïa ka scooter jong u kaba don u nombar AS-01EG-1106, kawei ka mobile phone bad ka wallet.
Shuh shuh ki pulit ki la ïathuh ba Medical Superintendent ka Civil Hospital, Khliehriat (EJH) la phah ka jingujor ba ha ka step jong ka 23 tarik mynta u bnai, ki runar bym lah ban ithuh ki la tuh kawei ka oxygen pipe line, nangta ka copper wire fan bad ki socket kiba la shnongdor kumba T. 1.2 lak napoh ka hospital.
