Shillong, jylliew 18: Katkum ka jingiathuh jong ki pulit la ong ba uwei briew u ba sah ha Shillong u la phah ka jingujor ba hadien ba u la ïohi ïa ka Facebook advertisement u la pynïasoh bad ka WhatsApp group jong uwei u Deepak Yadav bad la ai jingmut ïa u ban thep pisa hapoh ka stock market da ka jingkular ba un ïoh kham bun ka pisa hapoh shibnai.
Ha kaba iadei bad kane ka khubor ka iathuh ruh ba halor kane utei uba la ujor u la thep ka pisa kumba T. 14,25,047/- lak bad la ïathuh bad u la ïohnong kumba T. 40,82,079/- lak. Ha ka 16 tarik u bnai Jymmang, 2024, ban peit ïa kane ka jingshisha u la lah ban phah ïa ka pisa kaba T. 4 lak lyngba ka OTC sha ka UCO Bank account jong u.
La ong ba katba u dang pyrshang ban phah ïa ka pisa na UCO Bank jong u sha kawei pat ka Bank account lyngba ka mobile application, u la ïoh ka jingpyntip ba ka Bank account jong u ka la thylli.
Kham hadien u la sngewthuh ba ka account kaba u la phah ïa ka pisa kadei kaba thok bad ba u la shah thok lyngba katei ka Facebook Advertisement.
