Shillong, Nailar 24: Ka khubor ba la ïoh na ki pulit la ïathuh ba u Pinjing Marak u la phah ka jingujor ba ha ka step jong ka 12 tarik mynta u bnai ki runar bym lah ban ithuh ki la tuh ïa ka thuk thuk jong u kaba don u nombar ML-08H-5340 napoh ka shnong Wagegitokgre, West Garo Hills (WGH).
Ha kawei pat ka jingjia ki pulit ki la ïathuh ba kawei ka longkmie kaba dei na kawei ka shnong kaba hab hapoh ka West Garo Hills ka la phah ka jingujor ba ha ka 17 tarik mynta u bnai ha ka por kumba 4.14 baje janmied, ka la shah phone la bun sien, ha kaba uba phone u la thok ïa ka da ka pisa kaba kot T. 22,000/- da kaba ai daw ba u la kum bakla ba u la phah ïa ka pisa shapoh ka Bank account jong ka.
Shuh shuh ki pulit ki la ïathuh ba u Sremibirth D Sangma uba na ka shnong Watregre Apal, West Garo Hills (WGH) u la phah ka jingujor ba ha ka 19 tarik mynta u bnai ha ka por kumba 5 baje mynstep, u la shem ba ka Mahindra pick-up jong u kaba don u nombar ML-08G-5493 ka la jah napoh ka sem kali.
Ha kawei pat ka jingjia ki pulit ki la ïathuh ba u Charangsing Marak u la phah ka jingujor ba ha ka 18 tarik mynta u bnai ha ka por kumba 3 baje mynstep, u la shem ba ka thuk thuk kaba don u nombar ML-13A-7211 ka la jah napoh ka jaka sah jong u kaba ha ka shnong Dobakkol, North Garo Hills (NGH).
