Nongstoin, Risaw 24 : Uwei u rangbah uba kyrteng u Prestarius Thongni, 40 snem ka rta na ka shnong Seiñduli u la shah siat iap ha ki briew bym ithuh hapoh khlaw ha ka shnong Patharumlang ha ka janmiet 23 tarik katba ma u bad ki paralok ki dang ïaleit thap sim sha katei ka khlaw.
Kat kum ka khubor pulit ba la ioh la ïathuh ba kane ka jingjia ka la jia ha ka por kumba 4.30 ei ei ha ka janmiet Sngi U Blei. Namar une u la leit thap sim sha katei ka khlaw bad ki arngut ki paralok jongu hadien ba la wai ka jingiaseng. Kumta haba la poi ha katei ka khlaw kine baroh lai ngut ki la ïaleit la ka jong kajong ka lynti ban leit ap thap ïa ki sim hangno ki dem khnang ba ynda la miet kin ïoh ban leit siat da ka jri. Katba ki arngut ki dang don sha kawei ka jaka ki la ïoh sngew ba sawa shikuli dar bad ki dang mut ba ki don kiwei kiba wan beh mrad sha katei ka khlaw bad ki dang siat ïa ki mrad.
Haba la kem ïongreiñ ka bneng kumba la ïakut ban ïa kynduh ha ka jaka ba ïakhlad, ki arngut ki la ïapoi hynrei haba ki la ap katno katno ruh ïa u Prestarius u khlem wan phai kumta ki paralok jongu ki la leit phai sha la shnong bad leit kylli na kiba haïing ïoh u la wan phai noh sha ïing. Hynrei haba kiba haïing ki ïathuh u khlem wan phai kumta hi kiba haïing hasem lem bad ki para nongshong shnong ki la ïamih paidbah ban leit wat ïa u bah Thongni bad haba la poi hapoh katei ka khlaw ki la lap ïa ka met jongu ba u la shah siat ha ki briew bym lah ban ithuh.
Mar mar u kpa jong u bah Prestarius u Pherikstone Lyngdoh u la pyntip ïa kane ka jingjia bad ujor ejahar ha Mawshynrut Police Station bad ka jingtohkit halor kane ka jingjia ka la sdang mynta.
