Shillong, Nailar 31: Ka khubor ba la ïoh na ki pulit la ïathuh ba u Manik Dey u la phah ka jingujor ba ha ka step jong ka 27 tarik mynta u bnai ki runar bym lah ban ithuh ki la tuh ïa ka kali jong u kaba don u nombar ML-05J-9707 na Laban, Shillong.
Ha kawei pat ka jingjia kawei ka longkmie ka la ujor ba u don u paralok jong ka ha Facebook u ba la pynithuh kyrteng da u Fredrerech Fabian u la tyrwa ïa ka jingai sngewbha ïa ka da ka pisa kaba shongdor kumba T. 50 lak, ha kaba na ka liang jong ka kala kyntait. Kham hadien na ka liang jong u Fredrerech Fabian u la ïathuh ïa ka ba kane ka jingai sngewbha ka la poi ha India bad u la dawa pynban ïa ka pisa na ka, ha kaba ïa kane ruh na ka liang jong ka kala kyntait. Na ka liang jong ka ka la ujor ba utei u briew u la ïai pynthut ïa ka lyngba ka phone.
Sa kawei pat ka jingjia ki pulit ki la ïathuh ba uwei u nongshong shnong ka Shillong u la phah ka jingujor ba ha ka 27 tarik mynta u bnai ha ka por kumba 9.55 baje mynmied, arngut ki runar kiba shong hapoh ka scooter ki la thombor ïa u da u nar rod bad ka tari bad ki la knieh ruh ïa ka pla pisa kaba don kumba T. 25,000/- bad ki kot ki sla kiba kongsan ha RR Colony Rynjah, Shillong bad ki la phet krad na kane ka jaka. Ha kane ka jingjia utei u lanot u la mynsaw bad la pynkitnoh sha Bethany Hospital, Shillong ban ïoh ki lad jingsumar.
