Nongpoh, Risaw 04: Katto katne ngut ki samla na ka shnong 11 Mer bad 12 Mer Mawsmai, ki la shah tied bad shah shoh da ki bilor kyiad ha ki briew kiba ju khrong pisa (Syndicate) jong ka jylla Assam ha khrum jingkieng Jorabad kat haduh ba ki la mynsaw bad mong lut ka durkhmat.
Katkum ka jingtip ba la ioh lum, kane ka la jia ha ka janmiet sngi Balang mynta ka taïew ha ka por kumba 10:00 baje mynmiet ha kaba la kynnoh ba ki briew kiba ju khrong pisa ha khyrdop Syndicate jong ka Jylla Assam ki la bat ïa kawei ka kali ba shong da kine ki samla kiba thmu ban leit phai sha la iing bad la sei beit shabar ka kali da kaba shoh bad tied ïa ki da ki bilor kyiad bad dung ruh na ki bynta jong ka kpoh.
Halor kane ka jingjia ka Dorbar Shnong Mawsmai 11 mer ba la lamkhmat da u Rangbah Shnong u Bah Bah Petrus Shakwa ryngkat ka jingdonlang jong ki dkhot ka Federation of Khasi Jaiñtia and Garo Peoples (FKJGP) Byrnihat Circle ha ka sngi Thohdieng ki la lum kyrkieh da ka jingïalang ha Jorabad hajan ka khyrdop khrong pisa ka Assam ba ju pahara lang ruh da ki Pulit jong ka Jylla Assam ban dawa ba dei ban weng noh mardor ia ka khyrdop khrong pisa namarba ka dang dei ka bynta jong u pud u sam ka jylla Meghalaya bad ha kajuh ka por kane ka jaka ka dei kaba ju pynmih jingkulmar manla ka por bad kaba buh jingsyier ruh ïa ka leit ka wan ki paidbah.
Ka Dorbar Shnong lem bad ka FKJGP ki la rai ruh ban phah da ka jingthoh sha u Deputy Commisisoner ban phah weng noh mardor ïa ka khyrdop khrong pisa.
