Shah pynpra ki jingker nar bad signboard ha shilynter surok Umrit-Umdu, buh jingma ïa ki paidbah

Nongpoh, Nailar 27: Tang hadien katto katne snem ba la dep ban siang rong bad ban pynitynnad ïa u surok Umrit shaduh Umling ryngkat ki signboard bad ki jingker ban pynsuk ïa ki nongleit nongwan bad ban ïada na ki jingma khamtam ïa ki kali ban lait hap sharud surok, bun na kitei ki jingker bad ki signboard ki la shah pynjot bad jah lut bad ym lah ban tip satia mano ba leh ïa katei ka kam.
Halor katei ka jingshah pynjot bad ka jingjah jong ki signboard, na ka liang ka seng HNYF, Umrit Circle hapoh ka jingïalam u samla Kmen Ranee bad ki dkhot mynta ka sngi ki la leit ban jurip ïa katei ka surok bad lap ruh ba bun ki signboard kim don shuh bad ki jingker ki la shah pynpra lut khlem da pyrkhat ïa ka jingshngaiñ jong ki paidbah ba leit ba wan nalor ka jingdon ka jingtwa khyndew ha bun jaka kaba la buh jingma ïa ki paidbah haka leit ka wan.
Haba kren sha ki lad pathai khubor na ka liang u President ka seng HNYF Umrit Circle, u samla Kmen Ranee u la ong ba kum ka seng ka pynpaw ka jingsngewkhia halor ka jingdon ki riew khlem akor ki bym burom satia ïa kaei kaba ka sorkar ka la ai na ka bynta ka jingbit jingbiang jong ki paidbah namar bun ki jingker bad ki signboard ba la buh khnang na ka bynta ka jingshngaiñ ki paidbah ki la jah bad jot noh.
Kum ka seng ka la buh ruh da ka jingmaham kaba tyngeh pyrshah ïa ki briew ba donkti ha katei ka kam bad lada ka seng ka lap ne ioh jingtip ïa ki briew ba donkti ha katei ka kam kan sa leh da kaba tyngeh, namar ka jingdon kum kitei ki jait briew ka buh pynban ïa ki paidbah haka jingma kaba khraw.
Hakajuh ka por na ka liang ka seng ka la buh ruh ka jingkyrpad sha ka tnad PWD ba kan pynlong ka jingjurip namar ka jingtwa khyndew kiba bun ha shilynter utei u surok bad ban maramot katto katne ki bynta ba la sniew khnang ba ki paidbah kiba pyndonkam ïa utei u surok kin shngaiñ haka leit ka wan.