Shah pynkup burom ki nongïalehkai ka jylla ba khur takma ha ka jingrakhe ïa ka National Sports Day

Shillong, Nailar 29 : Ki nongïalehkai shynrang bad kynthei ka jylla ha ka sngi Nyngkong ki la shah pynkup burom ha ka tnad Directorate of Sports & Youth Affairs kum shi bynta ka jingrakhe ïa ka National Sports Day 2022 kaba la pynlong ha U Soso Tham Auditorium, Shillong.
Ka tnad Sports & Youth Affairs ka la pynkup burom da kaba sam ïa ki song pisa sha ki nongïalehkai ba kynthup naduh ki jait jingïalehkai Olympic bad Non Olympic kiba la khur takma na ki rynsan bad ki lympung bah la ka long hapoh la ka jylla, ha ka ri bad ha ka pyrthei hi baroh kawei.
Kane ka jingrakhe ka long ruh kum shi bynta ka jingkynmaw burom ïa uwei na ki khlur ïalehkai hockey bna nam jong ka ri India uba la khur takma ksiar bunsien u Major Dhyan Chand
Mynta u snem ka tnad Sports & Youth Affairs ka la pynkup burom ïa ki nongïalehkai da ka song pisa sha ki 469 ngut ha kaba ka la kot sha ka T.1.62 Klur.
Ha katei ka sngi la don lang u Bah Donald Philip Wahlang (IAS) uba dei u Chief Secretary jong ka jylla kum u kongsan, ka Kong WAM Booth (IAS) Director Sports & Youth Affairs, Kong Matsiewdor War Nongbri (IAS), ki dkhot ka Executive Committee ka Meghalaya State Olympic Association, ki coach, ki kmie ki kpa bad ki khynnah ïalehkai.
Ha kane ka sngi, ka tnat ïalehkai ka la pynkup burom ruh ïa ki arngut ki longkmie kiba la heh ka rta kiba ju pynleit jingmut bha ha ki kam ïamareh thong ne ka Marathon ba kynthup ïa ka Kong Kmoiñ Wahlang kaba dei na South West Khasi Hills bad ka ka Shyamili Chakraborty, kiba wat hapdeng ka rta ka jinglong tymmen pynban na ka por sha ka por ki ju mih shakhmat ban ïashim bynta sha ki jingïakop mareh kiba pher bapher kum ka dak ka jingai mynsiem na bynta kiwei pat ki nongïalehkai.
Haba ai jingkren kum u kongsan, u Bah D.P Wahlang u ai khublei ïa ka tnad ïalehkai jong ka jylla kaba la bteng ban ai ka jingkyrshan ïa ki nongïalehkai ba kin lah ban nang kiew shaphrang ha ki kam ïalehkai. U la kyntu ruh ïa ki nongïalehkai kiba la shah pynkup burom ba kin dei ban nang trei shitom bad pynkhreh bha ïalade ban lah ban mihkhmat bad ban khur ïa ki takma ha ka NorthEast Olympic Games ba ka jylla kan sa pynlong ha u Risaw-Nawieng mynta u snem.
U la ong ba bunsien ka jylla haba mih madan ha kiba kum kine ki jait jingïalehkai ka ju sahdien hynrei u la kyntu ïa ki nongïalehkai ba kin nang ïai trei shitom khnang ba kin ïoh ban khur ïa ki takma ban rah ïa ka nam bad ka burom jong ka jylla.
U Bah Donald u la kyntu ruh ïa ki ophisar ba dei khmih ïa ka tnat ba kin shim khia bad phai khmat ruh sha ki katto katne ki bynta kata ban shim khia ïa ka jinglah ban pyndep kaba dang shen ïa ka Talent Indentification Scheme. “Nga ai jingmut ba kum ka tnat kan thaw ïa ki lad ki lynti ban khreh ruh wat ban sdang ban ai ïa ka bai bam ne ka scholarship sha ki khynnah kiba thrang bad sliang ban paw ha ka kam ïalehkai,” ong u Bah DP Wahlang da kaba pynpaw ba u tip ba don ki longïing kiba ym lah ban kyrshan ïa la ki khun lada ki pynleit jingmut tang ha ka kam ïalehkai.
Shuh shuh u la pynpaw ruh ba ka jylla kaba dang pynkhreh ban pdiang ïa ka National Games ka dang donkam shibun ki jaka ïalehkai ban shna bad ka donkam ban buh ki shlem ai jinghikai kiba kyrpang. “Ka jingpynkhreh ka jylla ban pdiang ïa ka National Games bad kum ka jylla kan bun bha ki jaka ïalehkai kiba donkam ban shna, bad haba la dep ban pynlong ïa ki lympung hap ban don lypa ka thong ban khreh ban buh ïa ki shlem ai jinghikai kiba kyrpang ne ki ban don ruh wat ki hotel na bynta ki nongïalehkai ba ka jylla kam pat lah ban don kum kine ki jaka.”
U la ai jingmut ruh ïa ka tnat ïalehkai ba ha ki jait jingïalehkai kynhun ne ki team games ka la donkam ban don ka Group Insurance Scheme, namar haba jia ryngkhat kino kino ki jingjia bym poi pyrkhat kane kan dei kawei na ki lad kiba lah ban ai jingïarap.
Ha kane ka sngi ka tnat ïalehkai ka la kitbok kitrwiang ruh ïa ki team kiban leit mihkhmat ïa ka jylla sha ka lympung ïalehkai Subroto Mukherjee Cup International Football Tournament 2022 kaban long ha New Delhi.
Ki lai tylli ki team kiban leit ïashim bynta ha katei ka lympung ki long ka St. Anthony’s HSS U-17 (Boys), ka Ïewrynghep Secondary School U-17 (Girls) bad ka Roman Catholic Evening School, Mihmyntdu, Jowai kiba dei jong ka U-14 (Boys).