Shah pynïap beiñ ka longkmie Khasi ha ki suba Khar Bangla katba dang wan na ka kam khaïi

Khliehriat Nailur 12: Kawei ka longkmie kaba kyrteng ka Kong Priskila Suchiang na ka Shnong Donaskur, Elaka Narpuh, ka la shah pynïap dusmon ha ki runar kiba la suba ba kidei ki khat Bangladesh.
Kane ka la jia hynnin ka sngi, haba kane ka longkmie ka dang wan phai na jaka khaïi ba ryngkat ba u khun jong ka, namar ba kane ka longkmie ka ju ïatrei kam khaïi bad ki briew na Bangladesh.
La ïathuh ba hadien ba ka la iaid kjat katto katne por ka la shongthiat ha kawei ka jaka ba kham kynjah bad u khun u dang leit peit lynti kham shakhmat. Hynrei ynda u la wan phai u la lap ba ka kmie jong u ka la shah pyniap bad ka snam ka la lyngkien ha madan.
Na ka liang ki paidbah ki suba ba dei ki briew kiba ju khaïi bad ka kiba la leh ïa kane ka kam runar.
Na ka liang ki dkhot bad nongïalam jong ka Khasi Students Union Narpuh Circle hapoh ka jingïalam u Vice President u bah Phanuel Tongper, hadien ba ki la ïoh jingtip shaphang ka jingshah pynïap kane ka longkmie, ki la kynduh ïa kiba haiïng ha sem bad ki nongshong shnong ban tip khambha halor ka jingjia. Na ka liang ka seng ka la pynpaw ka jingsngewsih halor kane ka jingjia bad ha kajuh ka por ka pynpaw ka jingsngew bitar namar ka seng hi ka suba jur ba dei ki dkhar Bangladesh kiba la leh ïa kane ka kam runar.
Katkum u kyrwoh ba la phah da ka KSU Narpuh Circle la ong shuh shuh ba  “Katei ka longkmie ka don ar ngut ki khun bad ka dei kaba ju khaïi bad uwei u dkhar Muslim ha ki jaka ba khappud bad ka ri Bangladesh. Katkum ka jingiathuh jong ki trai shnong, la ong ba katei ka longkmie lem bad u khun shynrang jong ka hynnin ka sngi ki la mih na ïing bad iaid da ka kjat haduh ban da poi ha kawei ka ïng trep ha khappud bad ka dei ruh ka iingtrep ba katei ka longkmie ka ju shongthait, u khun jong ka u la ong ïa la ka kmie ba kan shongthait shwa hangta shiphang katba ma u pat u dang leit wad lynti ban pynpoi ïa  ki mar, ha ka por ba u la  wan poi biang sha kata ka jaka ba shong ka kmie u la lap ïa ka met jong ka kmie kaba la lynkieng da ka snam suda, kumta u la pyrta bad lynñiar, u la mareh sha ïng ban iathuh briew, mar mar hi ki nongshong shnong ki la leit mareh bad ki la lap ïa ka met jong katei ka longkmie ba la pom dusmon da ka wait na ki bynta jong ka khmat, ka khmut, na kti, na kjat ba la shu pom lyngkhot lyngkhai, kaba long  ka jingpyniap kaba i saitmet shisha kumba la iathuh da ki trai shnong”
“Ngi na ka liang ka seng ngim lah khlem da pynpaw ka jingsngewsih bad sngewbitar ïa katei ka jingleh dusmon ki khar Bangla bad ka seng ka pynpaw ka jingsngewlem ruh ïa kitei ki khun jong katei ka longkmie kiba la duh noh ïa la ka kmie baieid kaba la shah pyniap dusmon ha ki kti jong ki ‘riew thrang snam, ka seng ka maham ruh ïa kito ki briew trai shnong jong kito ki thaiñ kiba ju ïa khaïi pateng bad ki khar Bangla  ba ki dei ban long kiba husiar bha nangne sha khmat ban ïadei kam bad ki bad ruh ki trai shnong kim dei ban pynjuh pynjan ïa kitei ki khar Bangla lane ban ialam ïa ki shapoh shnong poh thaw watla ki ïadei kam ha ka khaïi pateng”.ong u kyrwoh.
La ong ruh ba ïa ka met jong katei ka longkmie la leit shimti da ki pulit bad rah sha Khliehriat Civil Hospital ban leh ïa ka post morterm, na ka liang ka seng ka kyntu jur ïa ki ki bor pulit ba kin  pynlong ïa ka jingthwet bad ruh ban buddien ban dup lap ïa kita ki riew thrang snam, kiba donkti ha kaba pyniap dusmon ïa katei ka longkmie bad ruh ban pynshitom tyngeh katkum ka aiñ ïa kiba donkti.