Leit pynsangeh u Bah Ardent bad ki paidbah ïa ka jingtam pud ki shipai Suiñ ha Lum Shyllong
Shillong, Nailur 12: Kumba u la ju leh na ka por sha ka por haba kyntur pud ki shipai, mynta ka sngi ruh u Bah Ardent Basaïawmoit, MLA ka Nongkrem u la ïalam lang ïa ki paidbah ban leit pynsangeh ïa ka jingkyntur pud ki shipai suiñ ha Lum Shyllong, kaba hap ha ka Shnong Rngi Shyllong.
Kane ka jingtam pud ki shipai Air Force, kadei da kaba tih bad pynïeng païa hakhmat jong ka khyrdop ban leit sha Shillong View Point. Shuwa jong kane na ka liang ka Shnong bad kumjuh ruh u MLA u la bthah ïa ka DC East Khasi Hills bad kumjuh ruh ka tnad PWD ban bthah ïa ki Shipai ban sangeh ïa kane ka jingwan tam pud sha ki jaka jong ka Shnong bad ka jong ka tnad PWD. Hynrei na ka liang ki Shipai kim shym la sngap, pynban ki la ïaid shakhmat bad ka jingtrei.
Mynta ka sngi haba u la ïohi ba ki shipai ki leh bym patiaw, u la hiar hi dalade ha katei ka jaka ba ki la tih bad pynïeng païa. Haba u Bah Ardent u la poi ha katei ka jaka, ki Shipai kiba kham rit kyrdan ki la kam ba kadei ka jaka jong ki, hynrei hamar katei ka por u Bah Ardent, u la kem ktien ba kane kam dei ka jaka jong ki shipai, hynrei kadei ka jaka jong ki paidbah bad ong ruh ba kadei ka jingmlien ki shipai ban shu kam ei kumne na ka por sha ka por. La ïoh sngew ruh ba u President ka VPP, u la kynteit ïa ki Shipai da kaba ong, “Ka DC ka la ai jingthoh ia me ba men sangeh ka jingtrei, ka tnad PWD ka la ai, hynrei mem ïa sangeh, mynta ngi wan ban pynsangeh ïa kane ka jingtrei jong me”.
Ki shipai kiba don ha katei ka por, ki la khot ïa u Bah Ardent ban rung shapoh ban ïakren hapoh ophis. Hynrei u Bah Ardent um shym la treh ban rung bad u la ong ba kadei ka kamram jong ki heh shipai ban wan shabar ban ïakren ha jaka ba u la toh bad pynïeng païa. Hadien la wan u shipai ba khamheh kyrdan uba la don ha ka kyrdan Commander ba ka la don ka jingïakren sngewthuh jingmut, namar ba na ka liang ki Shipai ki la kular ban sangeh noh ïa kane ka jingtrei bad na ka liang ki bor sorkar kin sa ïakren pynbeit ïa kane ka kam.