Shah maham ki kyrtong MDC ban leit ïalap elekshon ha khappud, yn ujor ka HBDR sha u DC

Khliehriat, Rymphang 09 : Ka Hynñiewtrep Border Disputed Redressal Forum (HBDRF) ka la byrngem ba kan ujor sha u Deputy Commissioner ka West Jaintia Hills hadien ba la phriang stet ki khubor ha ki rynsan social media bad ki lad pathai khubor ha poh Karbi Anglong Assam, hadien ba ka la mih ka jingkam na ki Jaidbynriew Karbi ba ki jaka ba thmu ban pynlong ia ki jingialap elekshon ki dei kiba hap ha u pud u sam jong ka West Karbi Anglong, Assam.
Katkum ka kyrwoh na ka HDBRF la ong ruh ba kane ka la mih hadien ka jingleit ïalap elekshon jong u ma Aiborlang Shadap na ka pary NPP bad ka Kong Binikas Laban na ka party India National Congress sha ka Shnong Mowjem Block -1 bad ha shnong Molber ha kaba ki paid Karbi ki la pyrshah jur bad kam ba kine ki jaka ki la hap ha u pud u sam jong ki.
La ong ruh ba na ka liang ka Hynñiewtrep Border Disputed Redressal Forum ka la rai ba ha kane ka sngi Nyngkong ka 10 tarik Kyllalyngot kin sa leit ban ïakynduh ïa u Deputy Commissioner jong ka West Jaiñtia Hills District ban ïakren halor kane ka mat bad ruh ban dawa na ki bor sorkar ba kin ïakren mardor bad ka sorkar Assam khnang ban pynneh pynsah ïa ka shongsuk shongsaiñ ha kane ka thaiñ.
Ka kyrwoh ka ong ruh ba na ka liang ka Karbi Students Association ( KSA) ka la maham lyngba ki lad pathai khubor ba ki Khasi Pnar na Meghalaya kim dei ban leit pynlong jingïalang elekshon hapoh shnong Labang Nangphyllut bad sha Pangam Raliang. La ong ruh ba ki pyrshah bad ki dawa ruh na ki bor synshar District jong ka West Karbi Anglong Assam bad Karbi Anglong Autonomous Council bad nym shah ïa ka Binikas Laban ba kan ïa khun elekshon sha Jaiñtia Hills Autonomous District Council namar ba ka dei ka briew kaba napoh Karbi Anglong bad ka shnong jong ka ruh ka dei napoh Karbi Anglong Assam.
Ki pynkynmaw ruh ïa ka jingbym leit thep vote jong ki Khasi Pnar sha ki artylli ki elekshon jong ka jylla Assam ka MAC ( Member of Autonomous Council ) bad elekshon MLA bad kumta ki pyrshah ruh ïa ki Khasi Pnar jong ka Block -1 ban leit shim bynta ha ki elekshon jong ka jylla Meghalaya”
Ka kyrwoh ka ong ruh ba ki nongïalam ka HBDRF kin sa ïakren bad ki Border Committee jong ka West Karbi Anglong ban leh ei ei bad ban peitngor halor kane ka kam.
Ha kajuh ka por na ka liang ki nong Jaiñtia kumjuhna ka JSM ki la kyntuia ki Karbi bad KSA ban ai ka jingiatreilang khnang ban wanrah ia ka shongsuk shongsaiñ ha ki shnong khappud bad ka jylla Assam.