Shillong, Jymmang 8: Ka Hynniewtrep Youth Council (HYC) ha ka sngi Nyngkong ka la tuklar halor ka jingkyntait ka aplikeshon thep kam hikai ka Dr Natalie Jo-Anne Diengdoh ba la khot da ka NEHU ha ka Department of Journalism and Mass Communication.
Ha ka shithi sha u Registrar ka NEHU u Prof AS Dixit, u General Secretary ka seng u Bah Roykupar Synrem u la ong ba ka seng ka la ïoh jingtip ba ka aplikeshon thep kam hikai ka Dr Natalie Jo-Anne Diengdoh kaba dei ruh ka riewlum (ST)na bynta ka post Associate Professor ha ka Department of Journalism and Mass Communication ha ka 15 tarik Ïaiong 2022 bad ka la aiti ïa ki kot ki sla (hardcopy) jong ki syrnot ha ka Establishment II ha ka 16 tarik Ïaiong 2022.
“Hynrei ïa ka aplikeshon la kyntait da ka screening committee ha ka 14 tarik 2023 bad la shu ai mark beit 0 khlem kino kino ki kynthoh (remark) ha baroh ki kyndon .” u la ong.
“Namarkata, ngi kyntu ïa ba phin khmih biang da kaba pynshong nongrim ha ki syrnot ba la aiti bad lada phi sngap ïa ka jingai jingmut kan long ka jingmyntoi ïa ki trai muluk ka jylla,” ong ka dorkhas ka HYC.
Ka HYC ka la kdew ba wat la ka Dr Natalie ka la pyndep shibun bah ki kyrdan jingpule ba kynthup ïa ka Doctor of Philosophy in Folkloristics, Masters of Arts in Journalism & Mass Communication, Sikkim Manipal University of Health, Medical & Technical Science, Shillong, 2008, B Div 64%, National Eligibility Test (Journalism & Mass Communication), University Grants Commission, 2012, bad kaba la don ha ka kam hikai naduh u snem 2013.
Shuh shuh ka HYC ka kdew ba ka Dr Natalie ka la pynmih 4 tylli ki kot ha ka ktien Khasi bad 2 pat ha ka ktien phareng.
“Ka la dei ka riewshempahng kaba la synñiang shi katdei sha ka jaidbynriew bad ka jylla na kata ka daw ym dei ban kheiñ dew thala ïa ki kam jong ka bad ka la long kaba kynsai bha ban ïoh ïa kane ka kam ban shakri ïa ka jylla”, bynrap ka dorkhas.
