Shah ktah ki paidbah ka Lelad na ki karkhana Coke, pynsngew ka SHG Lelad ha ka MLA bad DC

Khliehriat, ïaïong, 01: Ka dkhot jong ka Self Help Group shnong Lelad ka Kong Nikiarwon Sutnga ha ka sngi Baar ka la aiti da ka dorkhas ha ka MLA jong ka Sutnga Saipung Constituency ka Kong Santa Mary Shylla bad ha u Deputy Commissoner jong ka East Jaiñtia Hills District u Shivansh Awasthi ban pynpaw ia ka jingsngew khia halor ka jingshah ktah ha ki karkhana Coke.
Ia kane ka dorkhas ka Kong Nikiarwon ka la aiti ha ka prokram kaba ïadei bad ka jingthmu ban pynneh pynsah ïa ka mariang ba la pynlong da ka ophis jong u Divisional Soil & Water Conservation Officer, East Jaiñtia Hills District.
Katkum ka dorkhas, ka Self Help Group Lelad ka la kyntu ïa ka Kong Santa Mary Shylla bad ïa u Deputy Commissioner ba kin shim ïa ki lad ban ïada ïa ki shnong ki thaw ban lait na ki jingma kiba ap ïa ka jingim briew namar kum ki nongshong shnong manla ka miet kim ju iohthiah suk namar ka jingshah ktah ha ki lyer jakhlia kiba mih na ki karkhana Coke.
“Ngi sngew khuslai haduh katta katta haba ngi phai sha ka koit ka khiah jong ki khun ki kti bad kaba ap jingma ïa ka lawei bad ïa ka mariang, lada kan dang iai long kumne kane ka jaka ba ngi shong, ngi sah ha kane ka thaiñ kan sa poi ka por ba kan nym long shuh ïa ki briew bad ki mrad ban shong ban sah namar ka buh jingma ïa ka jingim,” la pynpaw ha ka dorkhas.
Ka SHG Lelad ka kyntu ruh ïa ka kong Santa Mary Shylla bad ïa u Deputy Commissioner ba kin ai lem ïa ka jingkyrshan ha kane ka jingpyrshah ïa ki karkhana Coke kiba pynmih ïa ka tdem bad ka lyer jakhlia bad ong ba kane shisha ka dei ka sienjam kaba eh than ban kin ïada ban lait na ka jingshah ktah ha ka koit ka khiah bad ka jingbit jingbiang ka shnong ka thaw.
“Ki jakhlia kiba mih na ki karkhana Coke ki buh jingma kaba lah ban wanrah ïa ka jingpang kaba ktah ïa ka jingring bad pynhiar mynsiem, ka lyer jakhlia kan pynjot, pynjulor ïa ka mariang sawdong,” la pynpaw ka dorkhas na ka SHG Lelad bad kyntu ruh ïa ki bor ba dei khmih ba kin peit bniah bha bad ban khang dam noh syndon ïa ki karkhana Coke kiba pyntrei beaiñ.
Ka SHG Lelad ka la dawa ïa ka MLA bad ïa u Deputy Commissioner ban pyntikna ban pynioh ïa ka khuid ka suba ka ban wanrah ïa ka koit ka khiah ha shnong ha thaw ban lait na ka lyer jakhlia kaba mih na ki karkhana coke.
Ka Kong Santa Mary Shylla bad u Deputy Commissioner ha kane ka prokram ha Lelad ki la kren shibun kiei kiei kiba iadei bad ka mariang bad pynneh pynsah ïa ki um, ki wah, ïa ki khlaw ki btap bad ki lad ban kyntiew ïa ki shnong lyngba ka Pradhan Mantri Krishi Sinchayee Yojana (PMKSY).