Khliehriat, Naitung, 14: Ka leit ka wan jong ki paidbah kiba ïaid lyngba na ka surok NH-6 ha ka thaiñ Narpuh East Jaiñtia Hills District ka la shah ktah biang na ka daw ka jingtwa khyndew ba jur ha Kuliang bad ka khyndew lem bad ki dieng, ki maw ki la hap bad syntuid sha surok national highway bad wanrah ïa ka jingdheng kali kaba jur bha ha ka thaiñ.
Ka jinghap ka kyndew bad jinghap ki dieng ka la jia naduh hynnin ka sngi bad mynta ka sngi u Blei ruh ka la jia biang ka jinghap kyndew ha ka juh hi ka jaka ha Kuliang ha kaba ki kali kiba iaid na katei ka surok ki la sahkut lut ha ka jingdheng kali kaba jur bha ha ka thaiñ Kuliang.
Ka surok ha ka thaiñ khamtam ha ka jaka ba hap khyndew ka la dap sa tang ka ktieh bad ka jyrsieh kaba jur bha bad ka um ktieh kaba la shu tuid pathar sha surok, kat haduh ba thoh ïa kane ka khubor, ki nongtrei jong ka National Highway Authority of India (NHAI) ki dang trei ha kaba pynkhuid ïa ka khyndew, ïa ka um ktieh bad ïa ki dieng ki maw kiba la kah lynti ïa ki kali ban iaid.
Ki khubor ba la ioh lum ki ong ba katei ka jaka ha Kuliang ka dang buh jingma ïa ki nongleit nongwan ha kaba ka jinghap khyndew ka lah ban jia biang ha kano kano ka por khamtam lada hap biang u slap.
Dang ha ki khyndiat sngi ba la leit ruh ka tnat pulit na East Jaiñtia Hills District ka la buh ka jingkyntu ïa kito kiba ñiah kali bad ïa baroh ki paidbah kiba iaid lyngba na ka surok national highway na Narpuh kata naduh Sonapyrdi shaduh Malidor ba ki dei ban long adkar bad phikr bha haba ñiah kali bad ba kin ap haduh ban da dep pynkhuid lut ïa ka khyndew bad ka ktieh.
Kumba ka long mynta kane ka surok ka la pynsuhsat bha ïa ki paidbah nongleit nongwan nalor ba ka dei ka surok kaba kongsan tam na ka bynta ki jylla ha North East.
