Shah ktah 42 tylli ki shnong julor 36 tylli ki jingtei bad ïap 2 ngut ha ka jinglyngshop ka mariang

Shillong, Jylliew 18 : Ka lyiur kaba la wan ïuhkjat ha Jylla naduh ka 10 tarik Jylliew, kala wanrah ïa u slap uba la neh bun sngi ha ryngkat ki jingpynjulor, kiba la ktah haduh 42 tylli ki Shnong ha ki 6 tylli ki District ka Jylla bad shim ruh ïa arngut ki mynsiem briew.
Kat kum ka jingkheiñ ba la ai da ka Meghalaya State Disaster Management Authority (MSDMA), kane ka lyiur ka la pynjulor ruh haduh 36 tylli ki jingtei ba kynthup ïa 17 tylli ki ïing nalor ki jaka rep kiba la kot sha ka 4.45 hectare.
Ka West Garo Hills, ka dei ka District kaba shah ktah jur bha ha kane ka lyiur ha kaba haduh 24 tylli ki Shnong kila shah ktah kynthup haduh 2825 ngut ki briew.
Artylli ki ïing bad haduh 15 tylli ki jingtei kila shah pynjulor ha kane ka District ka Ri-lum Garo na ka jingther jong u slap.
East Khasi Hills : Ha kane ka jinghap slap hapdeng ka 10 tarik Jylliew haduh 17 tarik Jylliew, kawei ka Shnong kala shah ktah ha East Khasi Hills bad uwei u briew ula iap na ka jingngam jyllop. Une u briew ba ngam jyllop u kyrteng u Bah Probino Warbah ba na Tynring, uba la ngam jyllop ha ka 7 tarik Jylliew bad ïoh ïa ka met ha ka 10 tarik Jylliew ha Wah Umrynjah, Mawlai.
East Jaintia Hills : Kawei ka shnong kala shah ktah jur ha kane ka lyiur bad haduh 107 ngut ki briew kila shah ktah ha kane ka District. La ïathuh ba ka jingpynjulor kala jur eh ïa ki jaka rep ha kaba haduh 3.45 hectare ka jaka rep kala shah ktah.
Eastern West Khasi Hills : Artylli ki Shnong kila shah ktah ha kane ka District bad 3 tylli ki ïing kila shah pynjulor kaba la ktah ïa 5 ngut ki briew.
South West Khasi Hills : Kane ka dei ka District kaba shah ktah jur eh ha kane ka lyiur ha kaba haduh 11 tylli ki Shnong kila shah lynshop ha u slap, uba wanrah ïa ka jingjulor haduh 13 tylli ki ïing bad ktah ïa kumba 88 ngut ki briew. Artylli ki jingtei ha kane ka District kila shah pynjulor bad haduh 1 hectare ka jaka rep kala shah pynjulor.
West Khasi Hills : Lai tylli ki Shnong kila shah lyngshop jur eh ha u slap bad haduh 11 ngut ki briew kila shah ktah. Ha kane ka District, uwei u briew ula iap na ka jingpom pyrkhat kaba jia ha ka 12 tarik Jylliew. Une u briew u kyrteng u Bah Kanty Maram uba dei na Nongkroh Rambrai.
Ka MSDMA ka pyntip ba ki jingtwa khyndew bad jingpoi umsaw ki wah, kila jia tang hapoh ka West Jaintia Hills bad South Garo Hills bad ka jinglum jingkheiñ ïa ki jingpynjulor ka dang ïaid shakhmat.