Shillong, Ïaïong 25: Ka khubor ba la ïoh na ki pulit la ïathuh ba kawei ka longkmie ka la phah ka jingujor ba ha ka 23 tarik mynta u bnai ha ka por 1.45 nohphai sngi, uwei u runar bym lah ban ithuh u la knieh ïa ka pla pisa jong ka kaba don ka pisa kumba T. 3,700/- bad ki kot kiba donkam ha Malki, Shillong.
Ha kawei pat ka jingjia ki pulit ki la ïathuh ba u Bah B Nongtdu ba na Lower Nongrim Hills, Shillong u la phah ka jingujor ba ha ka janmied jong ka 23 tarik mynta u bnai ki runar bym lah ban ithuh ki la prong hapoh ka kamra jong uba shongwai jong u bad ki la tuh ïa kawei ka laptop bad ki kot kiba donkam.
Shuh shuh ha kawei pat ka jingjia ka kong Baiasuklang Lyngdoh Nongbri ka la phah ka jingujor ba ha ka 23 tarik mynta u bnai ha ka por 10.30 baje mynmied, ka la shem ba ki runar bym lah ban ithuh ki la prong hapoh ka ïing jong ka kaba ha Nongthymmai Nongshiliang Block-5, Shillong bad ki la tuh ïa u jingdieng ksiar ba shongdor kumba T. 2 lak.
Ha kawei pat ka jingjia ki pulit ki la ïathuh ba uwei u nongshong shnong ka South West Khasi Hills u la phah ka jingujor ba ha u bnai Jymmang, 2024, arngut ki briew kiba kyrteng u Rajendra bad ka Manisha Kumar, kiba la kam ïalade ba ki dei ki agent ka NSDL Bank, ki la thok ïa u ka pisa kumba T. 1,61,761/- lyngba ka online.
Shuh shuh kawei pat ka longkmie kaba sah ha South West Khasi Hills ka la phah ka jingujor ba ha u bnai Rymphang 2024, ki briew bym lah ban ithuh ki la thok ïa ka, ka pisa kumba R. 28,000/- lyngba ka online.
Sa kawei pat ka jingjia, ki pulit ki la ïathuh ba ka kong Careful Siangshai ka la phah ka jingujor ba ha ka 24 tarik mynta u bnai ka la ujor ba ki runar bym lah ban ithuh ki la tuh ïa kawei ka thuk thuk napoh ka building kaba dang shna kaba dei jong u para jong ka napoh ka shnong Rymbai (EJH).
