Nongstoiñ, Rymphang, 13: Ka long kaba sngew tynnad ban tip ba ha ka taïew ba la dep ki nongshna ïa ki tiar put tiar tem tynrai na ki jylla ka thaiñ Shatei Lammihngi jong ka ri India, ki la shah khot sngewbha ha ka Droupadi Murmu ka President jong ka ri, ba kin wan ban pyni nam ïa ki tiar put tiar tem tynrai ba ki la shna ha la ki jong ki jong ki jylla, ha kaba ki nongshna ïa kitei ki jait tiar na kane ka jylla Meghalaya ruh ki la shah khot lang bad ki la leit ban ïa shim bynta ha ka jingpyni nam ïa kitei ki jait tiar ba ki la shna hi.
U bah Dominik Lyngkhoi haba pyntip ha u nongthoh khubor u la ong ba ka kynhun ki nongshna tiar put tiar tem tynrai na kane ka jylla, ki la mih naduh ka saw tarik mynta u bnai bad ki la poi ha nongbah Delhi ha ka por kaba biang, ha kaba ka President ka la wan ban plie ïa katei ka prokram ba kyrpang kaba long kum ka ïew ka ba heh, kaba la sdang naduh ka 6 haduh shiphew tarik mynta u bnai.
U la ong ruh ba hadien ba ka President ka la dep ban plie ïa katei ka ïew pyni nam ïa kitei ki tiar, ka la kwah ruh ban sngap ïa ki sur kiba syiang kiba mih na kaba tem bad put ïa ki, haduh ba ka la ang lyngngoh bad ïap biej ïa ki sur myllung kiba mih na ki ksai ba syiang jong ki duitara, ki besli, ki marynthing bad kiwei kiwei khamtam eh ïa ki tiar tem tynrai jong ka jaitbynriew Khasi, kiba la shna da u bah Dominik namar ba ki dei kiba ïahap tar bha bad ka jinglong jingman jong ka Jaitbynriew, kata naduh ka riti ka dustur ka riam ka beit bad ka jinglong tynrai naduh hyndai kulong kat kum ki khana tang.
Utei u rangbah u la ong ruh ban a pdeng ki nongshna ïa ki tiar put tiar tem tynrai kiba napoh ka jylla u la ïoh ban shong ha ka jaka kaba ha khmat duh bad kaba ïaid ïew tam bad u la ïoh ruh ïa ka nam kum uba hkhmat tam ha kaba pynmih ïa ki tiar put tiar tem tynrai.
U la ong ruh ba kiba la wan ban peit bad ban ban tip ïa ka rukom shna bad ka rukom pyndon kam ïa kitei ki tiar ki long naduh ki khynnah skul, college bad ki University kiba don ha ka nongbah Delhi bad ka jingbun jong ki nong wan peit kai ruh ka long kaba jur bha, naduh ka sngi ba sdang haduh ka sngi ba pynkut ïa katei ka prokram.
Nalor kata ka jingpyn poi ïa ki tiar put tiar tem tynrai kiba u bah Lyngkhoi u la shna hi, ka la pynlong ïa ka President ka ri ba kan ai ka jingïaroh bad pynshlur ba baroh ki jaitbynriew ki dei ban pynim ïa la ka riti ka dutur bad ki tiar put tiar tem tynrai, na ka bynta ban pynsah nam ïa ki khun bad ka pateng ban wan, khnang ba ka pyrthei shityllup kan tip ba ka jaitbynriew kaba don ïa ka riti ka dutur tynari ryngkat ki nongmuna kum, ki tiar ki tar ban pyndonkam, ka dei ka jaitbtnriew kaba dang im namar ka jaitbynriew ka bym don ïa ka rti ka dustur tynrai ka dei ka jaitbynriew kaba la ïap lypa.
