Jowai, Rymphang, 13: Ka seng ki nongdie doh masi ha Jowai kaba la tip kum ka Jaiñtia Livestock Butcher Welfare Association (JLBWA) hynnin ka sngi kala kyntu jur ïaki paidbah nongbam doh kiba ju mlien ban thied ïa ka doh masi thad tyrkhong ba kin long kiba husiar bha hashwa ban thied ïa kane ka doh.
Ïa kane la ïathuh da ki nongïalam ka seng naduh u Secretary ma D. Ryngkhlem bad u Vice President ma L. Pyrtuh haka jingïakren jong ki bad ki lad pathai khubor hynnin ka sngi 12 tarik ha Jowai, kila ong ruh naka por sha ka por kila ïoh jingtip naduh kine ki snem bala dep ki don ki nongshohdoh ynda kiba dep ban ot doh da ki masi kiba la ïap la katto kane por kila song ïaka doh da kaba leit pynpoi sha thaiñ Smit ban phah thad tyrkhong ïa ki ynda la dep kila wan rah biang ban die sha Jowai hadien ar sngi haka dor kaba duna, da kaba kila buh jingkylli kumno ka dor doh tyrkhong ka poi tang 400/- tyngka shi kilo, katba ka dor die im ha ïew ka poi 550/- tyngka?.
Na ka liang u ma D. Ryngkhlem ula ong ba kane ka kam kala sdang naduh u snem 2019 ha kaba ka kam shalan ïa ki masi bad ki muid ka jur bha sha ka Ri Bangladesh.
Katba u ma L. Pyrtuh ula pynsngew kum ka seng ka kwah ban shimkhia ïa kane ka kam, khnang ba ki paidbah nongbam doh kin ïoh ïaka doh kaba bha. Kum ki nongot doh ha Jowai bunsien kila ju mana ba ym bit ban ot ïa kino kino ki masi ki bym long shuh ban shoh doh.
U la buh jingkylli kumno ki nongdie doh thad tyrkhong ki lah beut ban pynïaid ïew khlem jingeh namar na ka liang ki paidbah nongbam ruh kim da peit bniah ne sylli bha ïa ka rukom long jong ka doh, katba ïaka doh kaba die ha ki ïew kaba ot ha ka por die nalor ba ka long kaba dang bha ki paidbah bunsien ki juh thlia.
Ha ka jingïadei bad kane u ma Pyrtuh ula kyntu ïa ki paidbah nongbam doh tyrkhong ki dei ban da husiar bha ban thied ïa kum kine ki doh da kaba kylli sani bha na ki nongïalam ka seng die doh namar kane ka ktah ïa ka koit ka khiah jong ki nongbam kumjuh ïa ka ïew ki nongdie doh ha Jowai.
