Shillong, Nailar, 09: U MLA jong ka North Shillong u Bah Adelbert Nongrum u la pynpaw ïa ka jingpang nud halor ka jingbym shah skhor bad ka jingleh mynthi jong ki bor pynïaid ka skulbah North Eastern Hill University (NEHU) ïa ki nongbylla sngi kiba shakri ha ki tnat bapher bapher jong kane ka skulbah.
“Dang shen ka jingïakhih jong ki nongbylla sngi kiba la pynsngew ïa ka jingdawa ban thung kum ki nongtrei ba pura ki la shah khñiot beiñ ha u Vice Chancellor jong ka NEHU bad ha ki ñiangkohnguh jong u. Ha ka jaka ban weng ïa kane ka jingeh da kaba khot sha ka miej jingïakren bad jingïamir jingmut, u Vice Chancellor bad ki ñiangkohnguh jong u ki la teipop kylla ïa ki nongbylla sngi da kaba khate wat ïa ka bainong sngi kaba ki dei ban ïoh tang na ka daw ba ki ïashim bynta ha ka jingïakhih,” ong u Bah Adelbert Nongrum.
“Ban khate ïa ka bainong ka long ka bym lah satia ban pdiang da leilei ruh em namarba ki nongbylla kim banse ban pynlong da ka jingïakhih kaba jai jai tang namarba ki dawa ban thung ïa ki kum ki nongtrei bapura. Hynrei u Vice Chancellor ha ka jaka ban khot ïakren ïa ki nongtrei bylla sngi hynrei la bthah pynban ïa ki bor pynïaid jong kane ka skulbah ban khate da ka bainong halor ka nongrim ba ki pep trei,” la kynthoh u Bah Adelbert bad bynrap, “ka jingpep trei ka dei na ka daw ba kim banse ban ïashim bynta ha ka jingïakhih bad kim don lad shuh da kumwei pat ban dawa ïa la ka jong ka hok.”
“Ka Meghalaya ka la duh haduh 1000 hajar akar ka jaka hadien ba la ai sha ka NEHU bad mynta une u Vice Chancellor u la pynsuhsat da kaba khate tulop ïa ki nongbylla trai jylla bad kiwei kiwei. Kane ka dei ka jingibeiñ ïa ki briew jong ngi ha la ka jong ka jylla Meghalaya. Khamtam haba ki kynthei kim banse ban shong hakhmat ka ophis treikam jong u Vice Chancellor ka NEHU. Ka long kum ka jingbym kheiñ snem ïa ki longkmie bad ki kynthei, khamtam ha kane ka jylla kaba burom ïa ka kynthei. Lymda u Vice Chancellor ka NEHu um sangeh noh ïa kine ki jingleh bym dei pyrshah ïa ki nongtrei bylla sngi ka NEHU, kan pynmong haduh katta kata ïa ki nongbylla ïa ki jingleh bym dei jong u VC,” u la ong.
“Nga dawa mardor ïa ki bor pynïaid jong ka NEHU ban pyllait baroh ka tulop jong ki nongtrei bylla sngi ka skulbah NEHU. Nga kyrpad ïa u VC ba um dei ban pynkhluit bad ba um dei ban ïalehkai bad ka jingim jong ki briew jong ngi,” la ong shuh shuh u Bah Adelbert.
“Nga dawa ba dei ban thung noh ïa ki nongtrei Casual kum ki nongtrei bapura khlem da pynslem shuh,” u la ong.
