Nongstoiñ, Lber 04: Ki riew runar ruser ki la pynïap dusmon ïa uwei u nongñiah tourist taxi ha Nongstoiñ, West Khasi Hills hynne ka miet shiteng synñia. Kane ka jingjia ka la jia ha ka por kumba 12:15 baje eiei ha Kynroh Taxi Stand, ong ki Pulit kiba pyntip ba une u nongñiah kali tourist ba kamai na Nongstoiñ-Shillong, u dei u ba la tip kyrteng u Macborn Bonnyson Kharbani 29 snem ba shong ba sah ha ka shnong Upper New Nongstoiñ.
Na ka liang kiba haïing hasem haba ïakren bad ki nongthoh khubor, ki la ïathuh ba ha kane ka miet, u Macborn u dang shu dep pynhiar lut ïa ki briew kiba wan na Shillong bad thmu ban leit phai noh sha la ïing. Hynrei haba poi ha steshon kaba don ha katei ka jaka, saw ngut ki briew ki la ker kut ïa u bad ki la kynroi ryngkat ka tim sih tim sang.
Kiba haïing ki ïathuh ruh ba ha katei ka por, uwei u briew u la dung da ka wait na ki bynta jong ka shadem jong u Macborn haduh ba u la kyllon beit khrup ha madan. Ki ong ba haba ïoh jingtip ïa kane ka jingjia na ka jingkren phone, ki la mareh wut wut sha kane ka steshon, ha kaba ki la lap ba u la thiah lyngktar ha madan. Hadien kane ki la pynkit noh mar mar ïa u sha Nongstoiñ Civil Hospital, hynrei ynda poi ha kane ka jaka sumar, ki doktor ki la pyntip ba une u samla u la khlad.
Na ka liang ki ba haïing hasem ki la leit ban ujor ïa ka ejahar halor kane ka jingjïa bad ki Pulit ki la pynlong ïa ka jingkhynra kaba jur ha ka thaiñ, ha kaba ki la ïoh kem ïa uwei u briew ba suba donkti u ba la tip kyrteng u Medius Mawlot na ka shnong Mawkaton.
Ki Pulit ki ïathuh ba u Medius u la phla ba u dei u ba dung ïa u Macborn. Ka jingtohkit mynta ïa kane ka jingjia ka la ïaid shakhmat ban lapdien sa ïa kiwei pat kiba donkti lang.
