Shillong, Lber 04: Ki Shipai BSF ki la ïai bteng ka jingkhynra ne ka jingïakhun pyrshah ïa ka jingkhaïi tuh ïa ki marbam na Meghalaya sha Bangladesh.
Ha kine ki 24 kynta kiba ladep, ki BSF ki la ïoh ban kurup haduh 33,000 Kilo ka shini ba la thmu ban khaïi tuh sha Bangladesh lyngba ki jaka khappud jong ka Meghalaya (South Garo Hills), India sha Bangladesh.
Ki kynhun shipai BSF jong ka 200 Batatlion, hadien ba ki la ïoh jingtip ba ka don ka jingthmu ban khaï tuh ïa ki marbam, ki la leit ban khang kdong ïa kane ka jingkhaïi beaiñ bad ryngkat ka jingïatrei lang ba ki Pulit, ki la ïoh ban kurup ïa kane ka shini kaba la buhrieh ha kawei ka ïing kaba khlem shong briew shuh kaba don ha Rongra Area.
Kawei pat ka jingïoh kurup kadei kaba la ïoh da ki shipai kiba ïaid pahara ha ki bynta jong ka Baghmara. Hadien ba la suba ïa kawei ka trok ba kit shini, ki BSF ki la bat ïa kane ka trok. Hynrei u draibar bad kiwei pat kiba don ha kali ki la phet noh bad iehnoh ïa ka mar ba kit ha ka trok. Na ka liang ki BSF ki la kurup noh ïa kane ka trok bad ka shibi ba la kit ha kane ka trok da ka jingthmu ban khaïi sha Bangladesh bad aiti sha ki Pulit kiba don ha katei ka thaiñ.
