Shillong, Nailar 20: U nongtrei ka North Eastern Council (NEC), u Shambhu Sharma ba la 58 snem ka rta, u la shah kem bad u la shah tohkit hapoh ka judicial custody halor ka jingkynnoh ba u la thmu ban leh khlem akor ïa ka nongtrei kaba ïatreilang kaba la 21 snem ka rta. Kane ka jingshah kem ka la jia ha ka sngi nyngkong nohphai sngi hadien ba la phah ka jingujor hapoh Laitumkhrah Police Station.
Katkum ka jingïathuh jong u Superintendent of Police u Bah Sylvester Nongtnger, ïa kane ka jingjia la pyntip sha ki bor badei peit kaba la lam sha ka jingshah kem noh u Sharma na ka ïingsah jong u. “Ha ka janmied jong ka sngi nyngkong ngi la ïoh ka jingpyntip lyngba ka phone shaphang kane ka jingjia ha kaba u nongtrei ka NEC u la leh khlem akor ïa la ka para nongtrei la jong. Ïa kane ka jingjia la pyntip mardor sha u Officer-in-Charge (OC) jong ka Laitumkhrah, kiba la leit ban kem noh ïa utei uba la shah kynnoh bad la rah noh sha police station,” ong u Bah Nongtnger.
La register ïa ka case, bad ïa u Sharma la ïalam ban pyndep ïa ka medical examination ha shwa ban ïalam sha court.
Ki tyllong khubor ki pynpaw ba kane ka la jia hadien ba utei uba la shah kynnoh u la kyrpad ïa katei ka lanot ban ïaleit lang bad u sha bank na ka bynta ki kam jong ka ophis. Hadien ba la dep ban leit sha bank, la kynnoh ba u Sharma u la ïalam ïa katei ka lanot sha ka quarters jong u halor ka jingai daw ban leit shim ïa ka tiffin jong u, la kynnoh ba dei ha kane ka por ba u la pyrshang ban leh ïa kane ka kam.
