Shah kem u ex-AIG (A) Bah G.K Iangrai halor ka bamsap tei ïa ka NERS PSAP ka tnad Pulit

Shillong, Naiwieng 2 : Ka Special Investigation Team (SIT) jongka CID hapoh ka jingïalam u DIG Eastern Range u Davis Marak mynta ka sngi ki la kem ïa Assistant Inspector General (AIG) Administration (A) ba rim bad uba long mynta u Commandant SF -10 u bah G.K Iangrai halor ka jingkynnoh bau pyndonkam bakla ïa ka pisa ban tei ïa ka National Emergency Response System (NERS) PSAP ha Sadar PS Complex.
ïa une u pulit ophisar la kem mynta ka sngi na ka ïing sah jong u na Golflink. ïa kane ka jingshah kem jong une u ophisar la pynshisha mynta ka sngi da u Symbud Myntri Rangbah ka jylla u bah Prestone Tynsong uba la ong ruh ba ka sorkar kam don lad shuh da kumwei hynrei ban weng kam noh shipor ïa une u pulit ophisar katba ka jingtohkit ka dang ïaid shakhmat.
La pynngat ïa une u ophisar ha ka case Prevention of Corruption Act bad la shimti ïa ka jingtohkit da ka tnad Crime Investigation Department. Kane ka tnad ka la thung ïa ka Special Inventigation Team (SIT) ba la khlieh da u DIG Eastern Range u Davis Marak.
U Inspector General of Police (IGP) CID u bah O Pasi ula pyntip ba la rejister ïa ka case naduh ka 28 tarik Risaw halor ki jingpyndonkam bakla ïa ka pisa na ka jingtei ïa ka NERS PSAP Facility ha Sadar PS Complex.
Ha ka jingtohkit hadien ba la kem ha ka 2.11.2022 la pynlong ruh ka jingkhynra ïa ki ïing sah jongu kat kum ka jingaibor jongka ïing bishar High Court. Ka jingkhynra ka long ha ïing sah jongu ha Lumshyiap Chanmari, Upper Golflink, ka Quarter jongu ha Golflink bad ka Farm House jongu ha Rtiang, Umsniang, Ri Bhoi.
Ha ka jingkhynra ki pulit ki la ïoh ban kurup bun ki kot ba donkam, ka pisa bad ki tiar ki tar ba donkam bad dei hadien kane ka jingkhynra ba la kem ruh ïa u. Ka jingtohkit ïa u ka dang ïaid shakhmat.
Kham mynshwa ha ka jingtohkit da u IG Law and Order u Mukesh Kumar Singh la lap ba u bah Iangrai u donkti ha kaba thied ïa ki 29 tylli ki kali jongka tnad pulit ha ka por ba u long AIG (A). Baroh 29 kitei ki kali ki don ha kti jong u bah Iangrai ha katei ka por. La thied ruh khlem da ïoh jingbit na ki bor ba halor.
Kine ki kali ki kynthup ïa ka scorpio, bolero ar tylli, ar tylli ki swift desire, ki thuk thuk Bajaj bad baroh ki dei ki bym pat don number plate bad kim biang ruh ki kot ki sla. Nalor kine kawei ka thuk thuk Bajai Pulsar 150 cc, kawei ka Hyundai Verna ba la shu buh da u number plate ba la shu thoh thok. Ka kynhun ka la tohkit ruh ïaki 7 nut ki pulit kiba trei bad u AIG (A). Kine ki la phla ba kine baroh ki kali ba la thied ki don beit bad u AIG (A) bad ki shabi ki don beit bad u bad ki sei ïa ki kali tang lada u hukum ïa ki ban leit sei.
Nalor kata la lap da ka kynhun tohkit ba ïa ka petrol ruh la theh katba mon namar ïa ki coupon la soi hi da u AIG (A). Kumta la lap ba kine kiei kiei baroh ki jingleh ki long ki jingleh palat pud nalor ba khlem da ïaid kat kum ki kyndon pynïaid ophis ne ïoh jingbit na ki bor ba halor.