Shillong, Iaiong 01 : Uwei u briew u la shah kem na kawei ka shnong ha ki thaiñ Nongpoh ha ka 31 tarik mynta u bnai namar u lehbeijot bad pynpun khun ïa la ka jong ka pyrsa kaba dang 15 snem ka rta.
Kat kum ka jingïathuh jong kiba haïing la ong ba ki la phah leh ïa ka medical test ïa katei ka khynnah ha ka 31 tarik Lber bad la lap ba na katei ka jingshah leh beijot ka la pun khun ruh ar bnai mynta.
“ Hadien ba ngi la tip halor kane ka jingjia ngi la ujor FIR pyrshah ïa utei u briew ha ka 31 tarik Lber bad ïa utei u briew la kem ha katei ka juh hi ka janmiet. Utei u briew u la byrngem ban leh ei ei lada ujot FIR ïa u” ïathuh kiba haïing.
Na ka liang kiba haïing ki kyntu ïa ki bor pulit ban pynngat ïa utei u runar ha ki kyndon aiñ ba pyrkhing bad ban set phatok ïa u shi junom namar kim kwah ba kum kane ka jingjia kan dang ïai jia biang ha ki por ban sa wan.
“ Namar ba ki don kum kine ki jait briew ka lawei jong ki khynnah ruh kam shngaiï shuh wat shiïing shisem ruh.Kum kane ka khynnah kaba pli ha ka jaka ba kan dang ïoh ban pyndep ïa ki jingpule hynrei mynta ka la hap ban shim ïa ka jinglong kmie. Kumta nga kyrpad ïa ki bor pulit bad ïa ki bor ka aiñ ban ai ka jingbishar hok” ong iba haiing.
