Nongstoiñ, Lber 12: Ki pulit ka Mawshynrut West Khasi Hills, hynne ka sngi ki la ïoh kem ïa ki saw ngut ki briew kiba la suba donkti ha kaba thom bor ïa ka ïing sah jong ka para u MLA ka Mawshynrut, kaba la jia ha ka miet sngi ba ar ha ka shnong Seiñduli 1.
Kane ka ïing ka dei jong ka kong Theresa Dkhar para jong u MLA bah Methodius Dkhar bad la kynnoh ba ka la don ka jinglun maw bad bitor ïa kane ka ïing ha ka por 11:30 ei ei mynmiet.
Na ka liang ki pulit ruh ki la ïoh pdiang ïa ka jingujor FIR bad hadien ka jingtohkit, ki la ïoh kem ïa ki saw ngut ki briew kiba la suba donkti ha kane ka kam.
Kine kiba shah kem ki kynthup ïa u Skhemborlin Hoojon na Nongryngkew A, u ba dei u trai jong ka kali Grand Vitara ML10 D 0254. Nangta u Firstbornshine Paliar na Seiñduli 1, u Shanborlsng Syiem na Seiñduli 1 bad u Silicus Swangre ba na ka shnong Tynhiang.
Ki pulit ki la ïoh kurup ruh ïa ka kali Grand Vitara jong u Skhemborlin Hoojon. Ki pulit ki la register case ïa kine ki briew katkum ka kyndon 125/324 (4) BNS bad ka jingtohkit ka la ïaid shakhmat.
