Shah kem haduh 14 ngut ki briew ba donkti ban pyllait ïa ka jingkylli MTET, pyntip u Myntri

Shillong, Lber 07: Ki la don haduh 14 ngut ki briew kila shah kem halor ka jingdonkti ha ka jingpynlait tuh ïa ki jingkylli ka eksam Meghalaya Teachers’ Eligibility Test (MTET) ha u snem 2019.
Ïa kane la pyntip da u Myntri ka Tnad Pule Puthi Rakkam A Sangma haba jubab ha ka kynta kylli jingkylli hapoh ka Ïingdorbar Thaw Aiñ ha ka sngi Thohdieng.
U la ong ba khatwei ngut napdeng ki 14 ngut ki briew ki dei ki samla pule kiba ïakhun ïa ka eksam MTET.
U Rakkam ula pyntip ba ka tyllong jong kane ka jinglait tuh ki jingkylli ka dei na u program developer bad u nongtrei ka NEICOM Impression Printing Press, Guwahati.
La ong ba ïa kane ka jinglait tuh ki jingkylli la ïoh ban bat nyngkong ha Tura Government College West Garo Hills. Nalor kane, u Myntri ula kular ba ka Sorkar kan sa shim ïa ki sienjam ban pynthikna ba kum kine ki jingjia kin ym jia shuh hadien habud.