Shillong, Naiwieng 3 : Ki pulit mynta ka sngi ki la kem ïa ki sawngut ki briew kiba suba donkti ha ka jingkhyrwit briew naphang ha ka sngi ïaid paidbah ka FKJGP kata ha ka 28 tarik halor ka jingkyrduh kam kyrduh jam ki samla.
Haba pyntip ïakane u SP ka East Khasi Hills u bah S.Nongtnger u la ong hadien ba la bud dien bad ïoh jingtip kaba thikna ba kine ki dei kiba suba donkti kumta ki pulit ki la leit pynlong ka jingkhynra naduh ka miet 2 tarik haduh 3 tarik ha East Khasi Hills bad Ri Bhoi District bad ïoh ban kem ïa kine ki saw ngut katba ki dang don kiwei pat kiba la tip da ki pulit kiba dang phet rieh mynta. ïa kine ruh ki pulit kin ym map hynrei kin thwet haduh ban da ïoh kem ïa ki.
U la ïathuh ruh ba ïa kne ki saw ngut yn sa ïalam tian bishar hakhmat ka ïing bishar bad ïa kine ki kam shoh briew bad pynkulmar la rejister case ha Laitumkhrah Police Station bad Sadar Police Station.
Ki pulit ki dang pynlong ka jingbud dien bad tohkit kaba bniah ban ïoh kem lut ïa baroh kiba donkti ban thaw jingkulmar ha katei ka sngi.
Shwa ïa kane ïa u General Secretary ka FKJGP u bah Eldie Lyngdoh ruh la khot hajir da ki pulit jongka Sadar Police Station bad ïa u ruh ki pulit ki la pynngat ha ki hynriew tylli ki kyndon aiñ.
