Nongpoh, Naitung 11: Hadien ba ki Pulit ki Pulit ka Ri Bhoi dang shen ki la ioh ban kem haduh 4 ngut ki suba ba ki dei ki dkhot ka HNLC na Ri Bhoi District bad mynta ka sngi da ka jingbuddien bad ka jingtohkit, ki la ioh ban kem sa ïa uwei u suba dkhot ka HNLC na Ri Bhoi District ba la tip kyrteng kim u Sanbor Rapsang bad uba dei ruh u Disciplinary Secretary ka HNYF sengkmie.
Kane ka jingkem jong ki Pulit ka Ri Bhoi ïa u suba dkhot ka HNLC, ka dei katkum ka jingtohkit bad ka jingbuddien lyngba ka case ba la register ha Umïam Police Station katkum ka Case No. 46(06)2024 U/s 120B/506/384/511 IPC R/W Sec 10/13/17/18 jong ka UA(P) Act. Kata hadien ba ki la ioh ban kem ïa u Kynsaijun Thabah ha ka 5 tarik u Naitung 2024, uba la phla halor ka jingdon kti jong u, ban ïarap pynpoi sha ka ri Bangladeh, kaba ki la ioh jinghikai pyntbit ha ka ktem HNLC ha ri Bangladeh.
Ki ki saw ngut ba la shah kem dang shen kiba dang don mynta hapdeng ka jingtohkit ha ki Pulit ka Ri Bhoi, ki kynthup ïa u Cyfrank Pual Pariat, Kitbok Mujai, Barnabas Lyngdoh bad Wanpynshngain Dympep bad mynta ka sngi Palei ki Pulit ki la kem sa u Sanbor Rapsang na ka Shnong Mawlai Umjajew, East Khasi Hills District, halor ka jingkynnoh don kti lang ha ki kam ba ïadei bad ka HNLC.
Ha u kyrwoh ba la phah da u Superintendent of Police ka Ri Bhoi u Jagpal Singh Dhanoa, la ong ba ka jingshah kem u Sanbor Rapsang, ka dei katkum ka jingphla u Kynsaijun Thabah, na Umlyngka,Kynton Block-II, East Khasi Hills District, uba la shah kem ha ki Pulit ka Ri Bhoi ha ka 5 tarik Naitung 2024 bad lyngba ka jingphla jong u, ki Pulit ki la buddien tad haduh ba mynta ka sngi Palei, ki la kem ïa u Sanbor Rapsang.
Katkum ka jingtohkit ïa u Cyfrank Paul Pariat uba la shah kem kham hashwa, u la phla ba u la leit shah ai jinghikai pyntbit sha ka ri Bangladesh ryngkat u Kynsaijune Thabah kumba shi bnai kata naduh ka shiteng bnai u Naitung 2023 haduh ka ka shiteng bnai u Nailar 2023 bad hadien kata ki la wan phai biang sha la ïing.
U SP u la ïathuh ba dei ha ka 5 tarik u Naitung, 2024, ba la kem ïa u Kynsaijune Thabah bad ha ka jingtohkit u la phla ba u la leit ryngkat bad u Cyfrank Pariat ban ïoh jinghikai sha ri Bangladesh kumba u la pynpaw naduh shiteng u bnai Naitung 2023 haduh ka shiteng u bnai Nailar , 2023.
Shuh shuh ha ka jingtohkit ïa u Kysaijun u la phla shaphang u Sanbor Rapsang ba u dei uba la pynbeit jarjar ban kdew lynti sha Bangladesh na ka bynta ban ioh ïa ka jinghikai ha ka ktem HNLC ha u snem 2023.
Dei lyngba ka jingbuddien bad ka jingtohkit ki Pulit la kem ïa u Sanbor Rapsang bad ka jingtohkit halor kane ka kam ka dang ïaid shakhmat.
