Shah kem 2 ngut ki dkhot HNLC ba donkti dawa pisa beaiñ na ki ophisar bad nongkhaïi ha Ri-Bhoi

Nongpoh, Jymmang 03: Ar ngut ki dkhot jong ka seng lehnoh HNLC, kiba ju dawa pisa beaiñ na ki nongkhaii trai ri bad ki ophisar ha kyrteng jong ka seng, kila shah kem noh ha ki pulit ka Ri-Bhoi hynnin ka sngi.
Katkum ka jingtip bala ïoh na ki pulit, la ïathuh ba ka seng HNLC ka la pyrshang ban lum pisa beaiñ na ki nongkhaii bad ki ophisar sorkar hapoh ka district, da ka jingbyrngem ba kin pynmynsaw lane pyniap ïa ki lada kim siew. Ha kaba ïadei bad kane, ki pulit ka Ri-Bhoi kila pynlong ka jingkhynra bad kila ïoh ban kem noh ïa uwei u suba uba la tip kyrteng kum u Pyndapbok Makri ha lad Quinine, katba u dang shim pisa bala dep dawa.
Ha ka jingtohkit ki pulit, sa uwei pat uba suba ba u dei u dkhot ka HNLC, uba la tip kyrteng kum u Lary Pynkmen Nongshli, u la shah kem noh ha Umtyrada ki pulit ka East Jaintia Hills.
La ïoh jingtip ba ki don ki riew pyrshah ri kiba shong ha Bangladesh kiba ïasnoh bad ka seng HNLC, kaba la shah pynbna kum ka seng beaiñ da ka Sorkar India, kiba phah ïa ki shithi dawa pisa lyngba WhatsApp sha ki nongkhaii Khasi bad ki ophisar sorkar da kaba byrngem ïa ki bad ki bahaïing jong ki, bad hadien kata ki phah ïa ki nongtrei jong ki kiba don ha ka jylla ban lum ïa ka pisa.
Kine ki samla kiba shah pynkhring ha kane ka kam, ki pdiang ïa ka kum ka lad ban kamai pisa kloi, hynrei ïa katei ka jingthmu la pynpulom noh ïa ki da ki bor pulit. Ka jingtohkit ka dang iai bteng ban lap ïa kiwei pat kiba donkti lang ha kane ka kam beaiñ.