Shah jied ka Samla na Ri Bhoi kum ka ‘Best Commander’ ha ka NCC Prime Minister Rally ha Delhi
Nongpoh, Kyllalyngkot 30: Ka long ka jingsarong bad ka burom ym tang ïa ka ïing ka sem, ka shnong ka thaw bad ka District bad ka nam bad ka burom ka long na ka bynta ka jylla Meghalaya, ha kaba kawei ka samla na Ri Bhoi ha ka rta kaba 21 snem ka la shah jied kum ka ‘Best Commander’ ha NCC Prime Minister Rally kaba la long ha ka 28 tarik u Kyllalyngkot ha Nongbah Delhi ba la shim bynta da u Myntri Rangbah ka ri, u Narendra Modi.
Kane ka samla kaba la ioh pdiang ïa ka nam best Commander ha NCC Prime Minister Rally nadpeng ki 17 tylli ki kynhun (Contingent) kiba la shim bynta ha kane ka rally ka dei ka samla Risa-iba Laloo, kaba dei ka khun jong u Bah Was Laloo bad ka Kong Wilda Teron na ka Shnong Diwon ha Ri Bhoi District.
Kane ka samla ka dei kaba leit ban mihkhmat ïa ka North East Region NCC Cadet na ka bynta ka NCC Prime Minister Rally ha Delhi bad kum ka samla na Ri Bhoi ka la shah jied ban long ka best Commander kaba la ïalam ïa ka parad jong ki 17 tylli ki kynhun (Contingent) ryngkat ka jingdon lang ki 4 platoon ka kynhun na ka tnad Army, Navy, Airforce, bad Army Senior Wings.
Nalor u Prime Minister ka ri India, u Narendra Modi uba la shim bynta ha kane ka NCC Prime Minister Rally ban ai jingkren ha katei ka sngi na ka bynta ki paidbah ka ri India hi baroh kawei, kiwei kiba la ïa don lang ki kynthup naduh u Defence Minister, u Rajnath Singh, u NCC Director General, u Lt Gen Gurbirpal Singh, u Chief ka tnad Defence Staff, u Anil Chauhan, u chief ka tnad Army Staff, u Gen Manoj Pande, u Chief of Naval Staff admiral. U R Harikumar, u Chief ka Air staff, u V.R Chaudhari bad u Defence Secretary, u Girdhar Armaane bad kiwei kiwei ki heh sorkar na ka sorkar kmie.
Haba la ioh ban ïa kren bad ka Samla Risa-iba Laloo, ka la pynpaw ka jingkmen ba ka la shah jied ban long kata ka Commander ha katei ka NCC Prime Minister Rally ba la shim bynta da u Prime Minister ka Ri India, u Narendra Modi kum u kongsan ryngkat ka jingdonlang ki heh sorkar na ka sorkar kmie.
Ka la ïathuh ruh halor ka jingshah jied kum ka ‘Best Commander’ ha katei ka NCC Prime Minister Rally ka la ioh pdiang ruh ïa ka khusnam ba la sam ha katei ka sngi kaba long ka jingkmen bad ka jingsarong ym tang ïa ka shimet kum ka samla na Meghalaya bad ka long ruh ka jingkmen na ka bynta ka ïing ka sem bad ka dong bad ka thaiñ hi baroh kawei.
Shuh shuh, ka la pynpaw ruh ba ka long ka jingsarong ruh ba haduh 17 tylli ki kynhun NCC (Contingent) kiba la shim bynta ha kane ka NCC Prime Minister Rally ka la ioh ïa ka lad ban command ne ïalam ïa kitei ki kynhun ba la shim bynta da u myntri rangbah ka ri kum u kongsan bad kane ka long shisha ka jingai mynsiem ïa ka kum ka samla ba kan dang lah ban don ïa ka thong ha ka jingim jongka kum ka samla na ka jylla Meghalaya ban jop ïa kiba bun ki jingangnud ha ka jingim jongka, ka la bynrap.
Ka la pyntip ruh ba ka la rung sha ka NCC cadet ka dei ha snem 2020 bad ban poi sha kane ka bynta kam dei ka kam kaba suk bad shuwa ban shah jied kum ka commander ha katei ka rally ruh ka la hap ban shah hikai ha Delhi bad dei ka jingtrei shitom bad ka jingkyrshan ki ophisar ba ìalam ia ka ka la shah jied ban long ka Commander ha katei ka NCC Prime Minister Rally, ong ka samla Risa-iba Laloo.