Shillong, Rymphang 26: Ka long ka jingsarong bad ka burom ïa ka jylla bad ka jaid bynriew hadien ba kawei na ki khynnah samla jong ka thaiñ kaba la tip kyrteng da ka Bonifila Shullai ka la mih kyrteng ha ka thup ki 23-ngut ki player ban mihkhmat ïa ka ri sha ka SAFF U16 Women’s Championship ka ban long ha Lalitpur, Nepal ka ban sdang naduh 1 tarik haduh 10 tarik u Lber.
Dang shen, ka Bonifilia Shullai ka paw kyrteng ha ka thup jong ki 30 ngut kiba la pynbna dang ha mynta u bnai shuwa ban pynthikna pura ïa ki kyrteng jong ki 23 ngut ki thei ïalehkai ban mihkhmat ïa ka ri sha katei ka lympung.
Ka jingpynbna ïa ka thup kyrteng ba khadduh la jied napdeng ki thei kiba la shah jied ban kilanmet ha Goa.
Kumban shu pynkynmaw, ka India ka la ïoh ban rah ïa ka namlahduh ha ka U-15 ha u snem 2018 bad 2019, hadien ba la pynliem ïa ka Bangladesh ha ka jingïakhun final. Bad kane kan dei ka sien kaba nyngkong ban pynlong ïa ka lympung ha ka kyrdan U16.
Ka kynhun ïalehkai jong ka ri kan sa mih ban leit sha Nepal mynta ka sngi shuwa ka jingïalehkai kaba nyngkong ka ban long pyrshah ïa ka Bhutan (Lber 1 tarik), bud sa ka jingïakhun pyrshah ïa ka Bangladesh (5 tarik Lber) bad ïa ka Nepal (7 tarik Lber).
Ki kynhun ba wan hakhmat ha ka round-robin stage kin ïakhun ïa ka final, bad ki jingïalehkai yn pynlong ha Chyasal Stadium ha Lalitpur.
Kynhun U-16 jong ka India:
Goalkeepers: Konjengbam Tamphasana Devi, Munni, Surajmuni Kumari.
Defenders: Amrita Ghosh, Bonifila Shullai, Divyani Linda, Elizabed Lakra, Gauri, Rheanna Liz Jacob, Rupashree Munda, Sarangthem Alena Devi.
Midfielders: Anita Dungdung, Anushka Kumari, Anwita Raghuraman, H Yashica, Longajam Nira Chanu, Ritu Badaik, Shveta Rani, Thanda Moni Baskey.
Forwards: Gurleen Kaur, Gurnaz Kaur, Neha Saji, Pearl Fernandes.
