Shah jied 40 ngut ki samla ban shah hikai ha ka Tour Guide Skill Training ha Amlarem

0

Jowai, Naiwieng 02 : Ki 40 ngut ki khynnah samla ki lah shah jied ban shah hikai ha ka Tour Guide Skill Training bala pynlong da ka Community Institute of Technology (CIT), Amlarem hapoh ka Amlarem Block ryngkat ka jingïatreilang ka ophis U Deputy Commissioner, West Jaiñtia Hills lyngba ka PMKKY Scheme.
Ïa kane ka programme la ïoh ban plie mynta ka sngi ka 2 tarik u Naiwieng, 2022 ha Sualudong, Thangbuli da u Dr. D. Lyngdoh, Block Development Officer, Amlarem C&RD Block ha ka jingdonlang u ma Lambormi Suchen uba long ruh u Skill Development Officer (SDO) jong ka Meghalaya State Skill Development Society bad ïaka programme ha kane ka sngi la pynïaid da u ma L. Lanong, Director, CIT.
Haba ai jingkren U kongsan ha kane ka sngi ula kyntu ïa ki nongshah hikai (trainees) ba kin shim khia ïa kane ka training namar kadei kawei na ki training ka ban ïarap ïa ki na ka bynta ban trei bad ban kamai ha ka kam Tourist Guide. Da kaba ki shim khia ïa kane kan wanrah jingmyntoi ïaki bad ïaka thaiñ Amlarem baroh kawei ha ka kam jngohkai namar ka thaiñ War Jaiñtia ka don byllai ki jaka ba itynnad ki ban long ki jaka shangkai na ki bynta ki nongjngoh kai pyrthei.
U la ban jur ruh ba ki samla kin shim khia ha ka kam lajong namar ka Sorkar kam lah shuh ban ai kam lut ïa ki samla bad ka Sorkar hi ka pynshlur ban shim ki sienjam ban thaw lad ïa ki samla bad ula kyntu ruh ïa ki ba kin pyndonkam hok ïa kaei ba kin ïoh lynba ka training, ban long kiba don akor, im ryntih bad ym ban ïabishni ïa pihuiñ.
U Skill Development Officer, Lambormi Suchen, u la ïathuh ba kane kadei ka programme kaba ka Sorkar lyngba ka office U Deputy Commissioner, West Jaintia Hills ka lah ïarap kyrpang na ka bynta kumno ban thaw lad ïaki samla sha ki nongkyndong ban phaikhmat bad shim khia ha ka liang ka tourism namar kane kadei ka karkhana aikam kaba biang eh hapoh kane ka District.
Ha kane ka training Tour Guide, 40 ngut ki khynnah samla shynrang bad kynthei kin ïoh ïaka training kaba 12 sngi bad ha kane ka training kin ïoh ban shah hikai ha ka Rapelling, Zumaring, knot practice, Rope stretcher, Basic First Aid, Trekking (Practical and Theory) Guide, bad kiwei kiwei.

Leave A Reply

Your email address will not be published.