Shah byrngem pynïap u kyrtong ka TMC na Khliehriat Constituency, mudui ejahar ha u SP

Khliehriat, Rymphang, 18: U kyrtong jong ka Meghalaya Trinamool Congress u Bah Sunida Bareh, uba aireng na Khliehriat Constituency u la mudui da ka ejahar ha ka ophis jong u Superintendent of Police (SP) ka East Jaiñtia Hills District halor ka jingkynoh ba u la shah byrngem lyngba ka mobile phone bad lyngba ka SMS ha uwei u briew uba la tip kyrteng kum u Aibormi Rymbai.
Ki Pulit hadien ka jingïohpdiang ïa ka ejahar ki la register case ha Ladrymbai Out Post hapoh ka Section 506 Indian Penal Code (IPC).
Katkum ka ejahar, u Sunida Bareh u la kynnoh ba ha ka 16 tarik, Rymphang, 2023, u la shah byrngem lyngba ka Mobile Phone na uwei u mobile number 8974916074 bad ïoh SMS na u Aibormi Rymbai ka shnong Rymbai, East Jaiñtia Hills District kaba pynpaw shai ba la thmu ban shim ïa ka jingim jong u bad ban leh da kaba tyngeh lada u dang nud ban leit sha ka shnong Rymbai.
“Kum u nongshong shnong jong ka ri India nga don ka hok ban ïakhun ïa kano kano ka elekshon” la ong Bah Sunida Bareh ha ka ejahar.
“Namarkata, nga kyrpad ïa ka ophis jong phi ban shimkhia mardor pyrshah ïa ki runar bad ban pynshitom ïa ki kham kloi khnang ban ïada na kum kine ki jingjia bym sngewtynnat ha ki por ki ban sa wan,” la ong u Bah Sunida.
Ka thymmei khubor ba la ïoh lum, ka la ïathuh ba ki Pulit ki la khot hajir ïa u Bah Aibormi Rymbai sha Thanat hadien ka jingshah mudui ejahar ha u Bah Sunida Bareh.
Ha ka jingïakren bad ki lad pathai khubor, u Bah Sunida Bareh, u la ïathuh ba ka ejahar kaba u la mudui mynta ka dei ka ejahar kaba ar.
“Ha kaba nyngkong kito kiba byrngem ki ladep ïamap bad ladep ïasuk bad kane mynta pat ha kane ka sien kaba ar,” u la ong.
U Bah Sunida u la ong shuh shuh, “ki la thoh beit ba kin pynïap, nga kum u briew nga don ka jingsngew bad nga la buh noh da ka ejahar pyrshah ïa u Bah Aibormi Rymbai, kiba telephone ki la shu phone beit naduh ka por 9:00 baje mynmiet haduh 2:00 baje mynstep khlem sangeh, bad ha ka SMS ba la phah la thoh ‘if you want to live, pick my call’ kaba mut ba ki la byrngem pynïap beit ïa nga.”
“Ka jingshah byrngem ka dei ka na ka daw ka elekshon, namarba tieng ïa ka ka vote bank jong ka party NPP ka dei ha shnong Rymbai bad nga dei u trai shnong na ka shnong Rymbai,” la kynnoh u Bah Sunida bad bynrap, “ka vote bank jong nga ruh na Rymbai, kumta ki wad da ki lad ki lynti ban pynjynjar ïa nga.”
Katkum ka jingïoh jingtip, ki nongkyrshan jong une u kyrtong ka TMC na shnong Rymbai, haba ki ïaid rally ki phong da ki jersy jong ka NPP, ki kaweh da ki lama NPP, ki leh kumne namarba ki sheptieng bad kumjuh ruh ki nongkyrshan jong ka UDP na ka shnong Rymbai ki shah pyndik.
“Shwa ban thep kyrteng ruh ki don kiba la telephone bad ong ba nga dei ban weng noh ïa ka jingthep kyrteng bad byrngem beit ba nga dei ban pyndam ïa ka jingthep kyrteng lada nga kwah ban im ha ka pyrthei, hynrei ngam tieng ïa kata, nga kumba ong nga tieng tang ïa u Blei, ïa u briew ngam ju tieng,” la ong u Bah Sunida.
“Ha ka 16 tarik, mynta u bnai ha ka por 10:00 baje mynmiet ki don kiba la telephone, lada ki ïoh ban pynïap ïa nga ki ïoh ïa ki vote, ki tip ba ka vote jong nga ka la tam mynta 2000 hajar ha ka shnong Rymbai. Na kata ka daw ki tieng bad ki shu kwah ban shu leh beit da ka bor. Ngam kwah ban shu ïaleh da ka bor, namar u briew u don la ka hok ban thep ïa ka vote ka jong ki,” u la ong.”
“Nga kwah ban ïoh jingïada, namar ha ka 27 tarik, Rymphang nga kwah ba ngan ïaid sha baroh ki Polling Station namarba ngam kwah ban ïohi lada don kano kano ka shnong kaba leh bor ïa ki nongthep vote bad u laiñ ruh u dei ban ïaid beit. Nga sngewnguh ba ka ECC ka la ai da ki CCTv ha ki jaka thep vote,” la ong Bah Sunida.