Shillong, Naiwieng 28: Ka khubor ba la ïoh na ki pulit la ïathuh ba ha ka 26 tarik mynta u bnai ha ka por kumba 4.30 baje mynstep, hadien ba la ïoh ka jingtip kaba thikna, ki pulit ha ryngkatlang bad u Bah Bashan Lyngdoh, Myntri ka shnong Kyrdoh (EKH) ki la ïohbat ïa 3 ngut ki suba nong Bangladeshi kiba ithuh kyrteng da u Umar Farook ba la 18 snem ka rta, u Md. Sajid ba 18 snem ka rta bad u Md. Iman Ali ba la 30 snem ka rta kiba shong hapoh kawei ka bus na jingkieng jong ka shnong Kyrdoh ha kaba kine ki suba nong Bangladeshi kim don ïa ki kot ki sla kiba biang.
Ha kawei pat ka jingjia kawei ka longkmie kaba shong basah ha Shillong ka la phah ka jingujor ba ha ka 20 tarik mynta u bnai, ki runar bym lah ban ithuh ki la thok T. 2,020/-, ban pynbook ïa ka hotel ha Ayodhya (UP) na ka bynta jong ka.
Shuh shuh ha kawei pat ka jingjia ki pulit ki la ïathuh ba u Sanjay Das u la phah ka jingujor pyrshah ïa marketing representative jong u, uba kyreng u Paras Thapa ba la 37 snem ka rta ba um shym la lah ban aiti ïa ki sale proceeding jong ki mobile phone kiba shongdor kumba T. 12,15,198/-. Shuh shuh ha ka 25 tarik mynta u bnai, 2024, utei uba la ujor u la tip ba utei u Paras Thapa u la mihnoh na Shillong ban leit sha Siliguri (WB).
Sa kawei pat ka jingjia kawei ka longkmie kaba sah hapoh Shillong ka la phah ka jingujor ba ha ka 11 tarik mynta u bnai, ki runar bym lah ban ithuh ki la thok pisa ïa ka haduh T. 1 lak, da kaba tyrwa ba kan trei na ïing, kaba ka la ïohpdiang lyngba ka ‘Telegram App’.
