Shillong, Nohprah 20: U National Spoke Person jong ka All India Trinamool Congress (AITC) u Saket Gokhale ha ka sngi Ba-ar u la pynher shithi sha ka Deputy Comissioner (DC) ka East Khasi Hills ka Kong Isawanda Laloo halor ka jingsam pisa u Myntri ka sorkar jylla u Bah Dasakhiat Lamare ha Nongkrem constituency ba ka dei ban ai jingshai la ka la dep tohkit ne em halor kane ka kam namar kat haduh mynta ym pat shym la pynbna paidbah eiei ïa ka kaiphot.
U Sakhet u la ong ba wat la u Symbud Myntri Rangbah ka jylla u Bah Prestone Tynsong u la kam ba kane ka jingsam pisa u Bah Dasakhiat kam dei satia kaba long be-aiñ namar ki kyndon ka Model Code of Cunduct kim pat treikam ha ka jylla, hynrei u Saket u la kdew ba ka jingsam pisa kaba khlem don ki rusit kata ka la dei lupa ka jingpynkheiñ ïa ka aiñ Prevention of Money Laundering Act (PMLA), 2002.
“Ka dei ka kamram jong ki pulit bad ki bor synshar district ba peit pyrman ba ki pisa bamsap ne Black Money ïoh kan long pynban ka pisa ban pynbiej ïa ki nong thep vote,” ong u Saket ha ka shithi ka DC.
“Haba u Myntri sorkar u sam pisa u dak jingkylli uba heh u la mih lupa la hato kane ka pisa ka dei ka pisa kaba kamai da ka hok ne ka pisa bamsap, ban wad jingshisha ka dei ka kamaram jong ki bor synshar district ban tohkit bad kumjuh ban ai kaiphot sha ka Enforcement Directorate (ED) hapoh ka kyndon ka PMLA, 2022 ïa kum kane ka jingkynnoh,” u la kdew shuh shuh.
“Namarkata nga kwah ban ïoh jingshai na phi la ka kaiphot tohkit la dep aiti ne em sha ka sorkar jylla, la ïa kane ka jingtohkit la dep ai kopi lang ne em sha u Chief Electoral Officer, Meghalaya bad la hato phi la ai jingtip ne em sha ka ED halor kane ka jingkynnoh sam pisa u Myntri lane hato phi la ai kopi ne em sha ka ED ïa kaiphot tohkit jong phi,” la buh jingkylli u Saket ïa ka DC.
