Ka jingmih madan jong ki Waheh Chnong ka sor Jowai lehse kan long ka jingpynkyndit thiah ïa ka Jaiñtia Hills Autonomous District Council (JHADC) bad ïa ka Jowai Municipal Board (JMB) ban wad ïa ka jaka thehñiut kaba biang na ka bynta ki phew lak tylli ki longiing jong ka shnong Jowai bad Khliehriat.
Hapdeng ka sohsat kaba la pynduhthiah duhdem ïa kiba bun, bluit la mih u Waheh Chnong jong ka shnong Moolamylliang u Bah Damewanhi L. Rymbai ban ïasoi bad ka Jowai Municipal Board ban ai jaka thehniut ha ka krem tih dewiong jong u ha Pynsymroo kaba don ha East Jaintia Hills District na ka bynta shi bnai. Dei ban ai jingïaroh ia une u rangbah uba don ka jingïohi jngai bad uba don ka mynsiem ban pyrkhat lem na ka bynta ka bha ka miat jong ka shnong ka thaw.
Jin lada ki don ki nongsynshar shnong kiba pyrkhat lem ïa ka bha ka miat jong ka imlang ka sahlang khlempep kin jin da la weng ïa une u sohkyrdot uba la pynktha maloi ïa ka Sorkar Jylla, ïa ka Municipal, ïa ki bor synshar District bad ïa ki paidbah nongshong shnong. Toi, ïa mynta shipor, ka Jowai Municipal Board ka la ïoh jaka thehñiut ha Moolamylliang na ka bynta shi bnai, hynrei kan jia aiu pat ynda la kut kane ka jingïasoi soskular kaba neh tang shi bnai?
U Myntri ka tnat Pynroi Sor uba dei ruh u MLA jong ka Nartiang u la dei ban sngewthuh kham bha ïa ka jingeh jong ki paidbah ka rilum Jaiñtia hynrei kumba ka paw baroh shikatta um pushe ban pynsngewthuh ïa ki shnong kiba marjan bad ka jaka thehñiut ha Mynkjai ba ka Sorkar kan pynshna bha ïa kane ka jaka khnang ba ki ñiut ki ñier kin ym tuid sha lynti ïaid bad kin ym her shane shatai bad kin ym pynjaboh ïa ki tyllong umbam umdih.
Ka Jowai Municipal Board kaba peit ïa ka khuid ka suba jong ka shnong ka thaw hapoh ka sor Jowai ka ladei ban thawlad ban pynsngewthuh ïa ki paidbah bad ïa ki bor synshar shnong na ka bynta ban weng ïa ki sohkyrdot ba ki paidbah ka sor Jowai ki la ïakynduh mawsiang. Ka jingpynlang ïa ki ñiut ki ñier hapoh ki jaka iew bad kat shaba lap bashem kan sa pynkha ïa ki khñiang jingpang ba laiphew jait.
Ka jingbym ïoh theh ñiut jong ka Jowai Municipal Board ha Mynkjai ka dei ka jingpyrshah jong ki shnong kiba na ka thaiñ War Jaiñtia kat haduh ba ka la pynlong ïa ka Synjuk Waheh Chnong Jowai ban pynmih da ka Quit Notice pyrshah ïa ki shnong kiba na ka thaiñ War Jaiñtia ba kim bit shuh ban wan rung shapoh ka sor Jowai kynthup lang ïa ka Khasi Student Union (KSU) War Jaiñtia Circle kiba la mih ban khang pyrshah ïa ka jingleit bret ñiut shipor ha Mynkjai. Kane ka jingpyrshah ka la buh ïa ka Jowai Municipal Board ha ka umdum bad ka surok ha Ïawmusiang ka la kylla long kum ka Marten kaba dap da ki ñiut ki ñier. Donbok ba kane ka jingïakynad ka la neh tang shipor bad poi noh sha ka jingïasngewthuh jingmut.
Kumba ka long mynta, ïa kane ka jingeh jong ki paidbah ka sor Jowai ym shym la don satia mano mano ba lah ban loit ban law namarba ka Jaiñtia Hills Autonomous District Council, ka ophis jong u Deputy Commissioner ka West Jaiñtia Hills, kynthup ruh ïa ka tnat Pynroi Sor kim pat lah satia ban pynïoh ïa ka jaka theh ñiut kaba biang pura haduh kine ki sngi ïa ki lak ngut ki paidbah jong ka Sor Jowai kaba la nang kharoi ki nongshong shnong na uwei u snem sha uwei pat.
Ka jaka theh ñiut kaba don ha Marten, Shillong ïa mynta ka ladei lypa ka jaka kaba la shlei haduh katta katta da ki jaboh jabaiñ bad kaba la buh jingma ruh wat ïa ka Damsite namarba lada ka kynroh kan bthei sha ki bynta jong ka lynti rim khlem pep ki jaboh jabaiñ kin sa tuid lut sha kane ka pung kaba kongsan tam hapoh ka jylla Meghalaya baroh kawei namarba ka dei ruh ka shlem pynmih bording ïa ka jylla.
Ka jingheh jingïar jong ka West Jaiñtia Hills District bad ka East Jaiñtia Hills District kam dei shuh kaba rit bad ki dei ruh ki ar tylli ki District kiba dang bun bha ki jaka khlaw ha kaba ka tnat Pynroi Sor bad ki bor synshar District ki dang lah ban thawlad na ka bynta ban pynïoh ïa ka jaka thehñiut. Manla ka sngi da ki phew ton ki ñiut ki mih na Sor Jowai, kata, na ki thliew iing jong ki briew bad na ki jaka iew. Ban shu sngap mynthi halor kane ka jingeh kam long satia kaba dei namarba ki paidbah hi ki dei kiba ïakynduh mawsiang lada kam don ka jingshimkhia na ki bor bahalor bad na ki bor Sorkar.
Lada ka Synjuk Waheh Chnong Jowai ka sngewkhia haduh katta katta ïa ka jinglang jong ki ñiut ha Sor Jowai ka la dei ban ai jingmut sha ka tnat Pynroi Sor, sha ka JHADC,sha ka JMB bad sha ki bor synshar shnong ban wad ïa ki lad ki lynti kiba lah ban pynkut noh ïa kane ka jingeh shisyndon. Ki dang bun ki jaka jong ka District Council ha West bad ha East Jaiñtia Hills kiba lah ban pynlong kum ka jaka thehñiut bad kiba dang jngai bha na ki shnong briew. Lada ki bor sorkar bad ki bor synshar shnong kim don ka jingïohi jngai ïa kane ka mat kaba kongsan kaba la pynmih ruh wat ïa ka jingïakynad kumba ka long mynta khlempep kan sa buh ïa ka jingeh hapdeng ki nongshong shnong na ka shnong Jowai bad na ka thaiñ War Jaiñtia.
Lada shi syn pyrkhat ban wad ïa ka jaka theh ñiut kam dei satia ban long u mawjynthud ïa ka imlang ka sahlang bad kam dei ban buh diengpynkiang ruh ïa ka dong ka thaiñ bad ïa ki paidbah nongshong shnong. Kum kine ki jingeh ki mih ruh na ka daw ka jingbym don mon jong ki bor synshar ban weng ïa kine ki jingeh kiba u paidbah u la mad. U MLA uba dei u shakri jong ki paidbah u dei ban leh eiei halor kane ka jingdawa khnang ba kan ym mih shuh kum kane ka jingïapher jingmut hapoh ka dong bad ka thaiñ baroh kawei.
Kane ka jingjia ka dei ruh ban long ka jingsneng ka ban pynkyndit thiah ïa kiba bun ki shnong hapoh rilum Khasi bad Jaiñtia bad ha rilum Garo khnang ba kin wad lypa ïa ki jaka na ka bynta ban pynlang ïa ki ñiut ki ñier bad ki jaboh jabaiñ kiba mih na ki thliew ïing jong ki nongshong shnong namarba ka jingkharoi jong ki nongshong shnong bad ki ing briew ki nang kiew na ka sngi sha ka sngi.
