Shillong, K’Lyngkot 23 : Ka dei ka sien kaba nyngkong eh ban ïoh sngew ba tang ha ka rta kaba dang 7 snem, ka Meghalaya ka la lah ban sei ïa u heprit u ban mihkhmat ïa ka jylla bad ïa ka thain shatei lam mihngi jong ka ri kum uta u Model lane u rang bhabriew ha ka lympung ïakob kaba heh bha kaba la sdang mynta ha Thailand.
Une u heprit u dei uba la tip kyrteng kum u Champ Charming Suchiang, khun jong i Kong Rihunlang Suchiang bad Prince Chetri kiba shong ba sah ha Rynjah, Lapalang Pdeng Shnong.
Kine baroh arngut shikmie shi kpa ki leit ban synran lang ïa u Champ sha katei ka lympung kaba tip kum ka IAMS International India 2025 kaba la sdang naduh ka 20 tarik bad kan kut pat ha ka 25 tarik mynta u bnai.
Na ka liang i Kmie jong une u heprit uba dang leit klas 3 mynta haba pyntip sha u Mawphor i la ong ba u Champ naduh dang kham rit u la pyni ïa ka sap kaba kham kyrpang ba u don khamtam ka jingsmat jong u ban pyrthuh bad ak kumba leh ki model ha ki TV.
“Haba ngi ïohi ïa ka sap ba u don ngi ruh ha iing ngi ai mynsiem bad pynshlur ïa u,” i la ong.
Shuh shuh i la ïathuh ba hadien ba ki la ïohi ïa kane ka jingsngewtynnad jong u, kum ta ki la wad ki lad ki lynti kumno ban pyntbit shuh shuh ïa u ha kane ka liang.
Ha kajuh ka por pat ki la pynpaw ruh ïa ka jingsngewnguh sha baroh kito kiba la kyrshan ïa u naduh kaba sdang ba un mih pyrthei bad haduh kane ka kynti kaba mynta ba u la ïoh ban leit mih ïakhun biang ha ka sien kaba ar.
Da kaba kyntu ïa ki paidbah ba kin ïai bteng ban kyrshan ïa ka jingïaid lynti jong u khun jong ki, i Kong Rihun i la ong, “Ka jingïoh jong u ban mihkhmat ha ki lympung kiba heh kum kine ki la dei lypa shi bynta ka burom kaba ki lah ban rah na bynta ka Jylla Meghalaya.”
