Sha Secretariat tur ka HNYM ban dawa ïa ka aiñ bhah 80% ïa ki trai muluk ha ki kam kompeni

Shillong, Risaw 20: Ka Hynñiewtrep National Youth Movement (HNYM) ha ka sngi Palei ka la tur kynsan sha Secretariat ban dawa ba ka sorkar ka dei ban wanrah da ka aiñ ai kam ai jam ne ka State Employment Policy ha ka jylla ba baroh ki kompeni shimet bad ki jaid kam baroh ha ka jylla yn mang kyrpang tang ïa ki trai muluk.
U President ka HNYM u Bah Louis Dohtdong u la ong ba ka seng ka lah dep ban ai da ka dorkhas sha u Myntri Rangbah ka jylla naduh u Naitung ban dawa ba ka sorkar ka dei ban rah ïa kane ka mat ha ka dorbar synrai hynrei haduh mynta ka sorkar ka la shu sngap mynthi bad leh klet ïa kane.
Namar kane, ka seng mynta ka sngi ka la tur paidbah sha Secretariat kum ka jingpyrshah ïa ka jingmynthi ka sorkar ban thaw noh da ka aiñ ïa ka jingbhah kam kaba 80% bad ban thaw noh ïa ka State Employment Policy khnang ba ki khynnah samla kin ïoh kam, ym tang ha ki kam sorkar (Government sector) hynrei wat ha ki kam shimet lane Private Sector ruh.
U la ong ruh ba kiwei kiwei ki jylla ha ka ri India ki la ïaid shakhmat ïa kane da kaba ai nuksa ïa ka Haryana, Andra Pradesh bad kiwei ba ki kam baroh la mang kyrpang ïa ki trai muluk.
U la ong ba namar ba ka jylla kam don ïa ka State Employment Policy ki khun samla ka ri Khasi kiba la pyndep ha ki kyrdan bapher bapher ki shu hap ban shong ïing bad kiba bun ki hap ban leit wad kam ruh sha bar jylla.
“Kum ka seng ha shuwa ba ka samoi jied nongmihkhmat kan poi ngi ruh ngi mih sha madan ban dawa ba ka sorkar kan leh eieei noh ïa kane. Ngi ïohi ruh ba napdeng ki 36 ngut ki nongmihkhmat na Rilum Khasi 35 ngut na ki kiba ngi donkam ban pynliem lyndang noh namar kim leh eiei ïa ka jaidbynriew jong ngi bad ki hun tang ka ïoh symbai sniang katba kiwei pat ki kam pynroi kim don jingpushe khyndiat ruh katba ki nongmihkhmat Garo ki rah shi khung bah ki kam pynroi” u la ong.
U la ban jur ruh ba namar ka jingkyrduh kam hapdeng ki khun samla ka jylla, ka wanrah ïa ki jingsniew ba bun byllai khamtam ha ka jingngop ki khynnah samla ha u drok.
Shuh shuh na ka liang jong u u la dawa ba ka sorkar ka dei ban leh eiei noh halor kane hapoh 10 sngi lym kumta ka seng kan pynlong ïa ki jingïakhih kiba kyndit kyndit kiba wat ka sorkar ruh kan lyngngoh.