Shillong, Naitung 05: U Symbud Myntri Rangbah bad u Chairman jong ka Regional Committee ka West Jaiñtia Hills u Bah Sniawbhalang Dhar un sa leit jngoh ïa ka shnong Lapangap ha ka 8 tarik mynta u bnai hadien ba la mih ki jingjia ïakajia pud kaba la mih ruh ka jingkynnoh ba wan kyntur pud da ka Assam.
“Ngan sa leit ban jngoh ïa ka shnong Lapangap ban khmih ïa ki jinglong jingman ha kane ka shnong,” ong u Bah Dhar.
Lah ban pynkynmaw ba ha ka 25 tarik u bnai Jylliew ka la mih ka jingïakynad kaba jur ha shi lynter jong u pud u sam ka Assam bad Meghalaya hadien ba u paidbhur uba palat 400 ngut napoh ka shnong Lapangap bad ki shnong ba marjan kaba ha West Jaiñtia Hills ryngkatlang bad ki sengbhalang ki la leit ban pynpra ïa ki ïing dieng bad ki la jynrat ruh ïa ki tynrai dieng kiba la thung kaba long kum ka dak ban pyrshah ïa kane ka kam thung dieng kaba la leh da ka Karbi Anglong Autonomous Council (KAAC), kaba katkum ka jingong jong ki, ka dei ka jingpyrshang ban kyntur pud beaiñ shapoh u pud u sam ka Meghalaya.
Ha ka sngi Balang pat u Bah Dhar u la ïathuh ba ka sorkar ka la ïakren bad ka Assam ban pynbeit ïa kane ka kam kaba la mih na kane ka jingïakynad hapoh ka shnong Lapangap.
“Dei halor kane ba ka jinglong jingman mynta ka la long kaba jai jai. Ngi dang bteng ban don ka jingïasyllok ha baroh ar ki kyrdan jong ki Myntri Rangbah ban pynbeit noh ïa kane ka kam,” ïathuh u Bah Dhar sha ki lad pathai khubor.
U la kdew ruh ba kine ki jingpyrshang la leh ban pynbeit ïa ki jingïakynad kiba la mih ha kane ka shnong.
Haba kylli la ka shnong Lapangap ka hab hapoh ka kam jingïakajia pud, u Bah Dhar u la pynshai ba ha ki por ba mynshwa kam dei ka shnong kaba don ka jingïakajia pud.
