Sha ki 15 ngut ki ASHA Facilitators bad 316 ngut ki ASHAs la sam ïa ki Tablets ha South West Khasi Hills District

Mawkyrwat, ‘Nailur 26: Ka ophis treikam jong u District Medical & Health Officer (DM&HO), South West Khasi Hills District mynta ka sngi ka 26 tarik u ‘Nailur, 2024 ka la ïoh ban sam ïa ki ‘Android Tablet’ sah ki 15 ngut ki ASHA Facilitators bad sha ki 316 ngut ki AHSAs ha ka jingïalang ba la pynlong ha phyllaw ka jaka treikam jong u District Medical & Health Officer.
Ha kane ka jingïalang, u bah Renikton Lyngdoh Tongkhar, MLA jong ka Mawkyrwat Constituency u la long kum u kongsan ha ryngkat ka jingïadonlang u bah Eson Khongrymmai, District Mission Manager (DMM) jong ka Meghalaya State Rural Livelihoods Society (MSRLS), South West Khasi Hills District, u bah E. Tariang, District Social Welfare Officer (DSWO), South West Khasi Hills District ryngkat ruh ki AHSA Facilitators bad ki AHSAs kiba na kylleng ki shnong.
U bah Renikton Lyngdoh Tongkhar, MLA jong ka Mawkyrwat Constituency kum u kongsan haba kren ha ka jingïalang ula ong ba ki ASHA ki long kita ki atiar ha kaba ka sorkar ka pyndonkam ïa ki ban long ka khubor kaba hakhmat eh jong ka tnad ka koit ka khiah ha ki longïing longsem, ha ki shnong ki thaw bad da kata ka jingtreikam jong ki, u bah Renikton u la pynpaw ka jingaikhublei ba kyrpang namar ba ki long ruh ki nongbtin lynti na ka bynta ki longkmie bad ki khyllung ha ka liang ka jingbit jingbiang jong ka jingkoit jingkhiah.
Ula ïathuh ba hapoh ka Jylla Meghalaya ka jingsam ïa kine ki Android Tablets ka la ïaid mynta ha kiwei de ki distrik. Shuh shuh u la ong ba kumba ngi im mynta ha ka juk jong ka jingstet ha ki jingtreikam bad kata ka long kaba jingshisha namarkata, u bah Renikton u kwah ban ai jingmut ïa ki ASHAs ba kumba haba kiwei ki ri kiba la khamshai ki la leh da ka juk stad mynta ma ki ruh ki dei ban pyrshang ym ban shu pyrshah ïa kata.
Namarkata, u la ong ba ka long kaba donkam ba haba ki ASHA kiba la ïoh jingpynshai lyngba ki jingshah hikai ha kiba bun ki prokram ba ma ki kin long ki nongsam lem ha kiwei pat ki bym pat lah ban pyndonkam ne shai khnang ba kan nym buh jingeh ïa ki lyngba ki lad jingïarap kiba bun ha ka liang ka jingkoit jingkhiah.
Shuh shuh ha ka jingkren jong u, u la ai mynsiem ïa ki ASHA ba haba ki leit ban rung na kawei ka longïing sha kawei pat ki dei ban ïathuh ba ka jingleh jong ka sorkar kam shym dei na ka bynta ka jingmyntoi jong ka hynrei ka dei ïa ka jingkoit jingkhiah jong i kyllung naduh dang rit kata naduh ka kpoh ka kmie. Ym tang kata, u la ong ba ki ASHA ba kin ïai long ma ki ki nongrah khubor sha ki longkmie ba ar met, ba haba la dei ka por ban kha khyllung da lei lei kim dei shuh ban dang kha ha ïing hynrei ki dei ban shlur ban leit sha ki jaka sumar khnang ba kin ïoh jingsumar ba paka bad ba kin lait na kino kino ki jingeh.
Haba kren halor ka jingsam ïa ki Android Tablets, u bah Renikton u la pynpaw ka jingkitbok ktirwiang na ka bynta jong ki ASHAs ba na ka liang sorkar ka ai ïa kine Android Tablets kin sa long kiba ler kam ha ki jingdonkam jong ki watla don napdeng jong ki ki ban sa shem jingeh ban pyndonkam hynrei da ka jingïatreilang hi yn lah ban pyntreikam ha ka rukom kaba dei. “Lyngba kane ka Android Tablets kan long ruh ka jingmyntoi na ka bynta ki ASHAs ba kin buh jingkynmaw ban pynkynmaw ïa longkmie ha kaba ïa dei bad ka por jong ka jingaitika bad kiwei de ki jingdonkam”, u la ong.
U la kren ruh halor ki jingeh jong ki ASHAs kaba ïa dei bad ka jingsiew bad ïa kane ka kam watla ka sorkar ka la leh khyndiat khynsoit hynrei ma u ruh kum u nongmihkhmat u la pynpaw ba un sa nang ïai pynsngew shuh shuh sha ka sorkar khnang ba ma ki kin ïoh noh ka jingsiew kaba bit ba biang bad ym tang kata u la kular ruh ba ma u lem u MLA jong ka Ranikor Constituency kin sa ïa thaw lad ki lynti ban leh ei ei na ka bynta jong ki ASHAs.
Ïa ka jingïalang la pynïaid da u Dr. W.L. Nary, Maternal and Child Health (MCH) Officer, South West Khasi Hills District, ka jingkren pdiang na u bah P. Mawsor, District Programme Managers (DPM) jong ka National Health Mission (NHM), South West Khasi Hills District bad jingkren khublei na ka kong A. Lyngkhoi, District Programme Managers (DPM) jong ka Mawkyrwat Block.